10.12.2025 | 20:39
Հայաստան–Հունաստան հարաբերությունների խորացման նոր հնարավորություններ. Դավիթ Կարապետյանի հանդիպումը Լուկաս Ցուկալիսի հետ
Պեսկովը հայտնել է Պուտին-Թրամփ հեռախոսազրույցի ժամը
Քաղաքականություն
19.05.2025 | 14:15
ՌԴ նախագահ Վլադիմիր Պուտինը և նրա ամերիկացի գործընկեր Դոնալդ Թրամփը մայիսի 19-ին հեռախոսազրույց կունենան։ Զրույցը տեղի կունենա Մոսկվայի ժամանակով 17:00-ին։ Այս մասին հայտնել է Կրեմլի պաշտոնական ներկայացուցիչ Դմիտրի Պեսկովը, փոխանցում է Իզվեստիան։
Նա պարզաբանել է, որ զրույցը տեղի կունենա՝ հաշվի առնելով Ստամբուլում ռուս-ուկրաինական բանակցությունների արդյունքները։ Ըստ Պեսկովի՝ Պուտինի և Թրամփի հանդիպումը կախված կլինի նրանց կողմից նշանակված ամսաթվերից։
«Հանդիպումը, իհարկե, պետք է մշակվի, բայց կախված նրանից, թե ինչ ամսաթվեր են նրանք նշանակելու, թիմը կհարմարվի։ Ամեն դեպքում, ինչպես մեզ թվում է, հանդիպումը, իհարկե, պետք է արդյունավետ լինի։ Բայց արդյունավետ լինելու համար այն պետք է լավ պատրաստված լինի»,- ասել է նա։
Կրեմլի ներկայացուցիչն ընդգծել է, որ Մոսկվան գնահատում է Վաշինգտոնի միջնորդական ջանքերը ուկրաինական հակամարտության հարցում և շնորհակալ է ամերիկյան կողմին։ Նրա խոսքով՝ Ռուսաստանը նախընտրում է պատերազմի «նպատակներին հասնել դիվանագիտական ճանապարհով»։
Բացի այդ, Պեսկովը նշել է, որ ԱՄՆ նախագահի հատուկ ներկայացուցիչ Սթիվ Ուիթկոֆի այցը Ռուսաստան կարող է համաձայնեցվել անմիջապես, երբ նման անհրաժեշտություն առաջանա։
Թրամփը Պուտինի հետ հեռախոսազրույց ունենալու մտադրության մասին հայտնել էր մայիսի 17-ին։ Նա Truth Social-ում գրել էր նաև, որ Պուտինի հետ հեռախոսազրույցից հետո կզրուցի Ուկրաինայի նախագահ Վլադիմիր Զելենսկիի և «ՆԱՏՕ-ի տարբեր անդամների» հետ։
«Զրույցների նպատակները լինելու են արյունահեղության դադարեցումը, որի ընթացքում շաբաթական միջինում զոհվում է ավելի քան 5000 ռուս և ուկրաինացի զինվոր, ինչպես նաև առևտուրը»,- նշել էր Սպիտակ տան ղեկավարը՝ հույս հայտնելով, որ դա կլինի «արդյունավետ օր», և որ արդյունքում կհաջողվի Ուկրաինայում հրադադարի շուրջ վերջնական համաձայնություն ձեռք բերել։
Թարգմանությունը՝ Էմմա Չոբանյանի
