Քաղաքականություն
19.05.2025 | 13:05
Հավաքական անվտանգության պայմանագրի կազմակերպությունը (ՀԱՊԿ) հուսով է, որ Հայաստանի և Ադրբեջանի միջև խաղաղության պայմանագիրը շուտ կստորագրվի։ Այս մասին հայտարարել է ՀԱՊԿ գլխավոր քարտուղար Իմանգալի Տասմագամբետովը, գրում է ՏԱՍՍ-ը։
«Կովկասում կան որոշակի դրական շարժեր։ Դա Հայաստանի և Ադրբեջանի հայտարարությունն է բանակցությունների ավարտի և երկու երկրների միջև միջպետական փաստաթղթի տեքստի համաձայնեցման վերաբերյալ։ Փաստաթղթի շուտափույթ ստորագրման հույս ենք հայտնում և ակնկալում ենք, որ դրա իրականացումը հուսալի ճանապարհ կհարթի Հարավային Կովկասում խաղաղության և կայունության համար»,- ասել է նա ՀԱՊԿ Խորհրդարանական վեհաժողովի խորհրդի նիստում, որն անցկացվում է Բիշքեկում։
Հիշեցնենք, որ թեպետ ՀՀ-ն և Ադրբեջանը համաձայնեցրել են խաղաղության պայմանագրի տեքստը, Բաքուն տարբեր պատրվակներ է առաջ քաշում համաձայնագիրը չստորագրելու համար։ Մասնավորապես, Բաքուն պահանջում է ՀՀ Սահմադրության փոփոխություն ու ԵԱՀԿ Մինսկի խմբի լուծարում։
ՀՀ վարչապետ Նիկոլ Փաշինյանն ավելի վաղ Ադրբեջանին առաջարկել էր ԵԱՀԿ Մինսկի խմբի լուծարման մասին համատեղ դիմումն ու խաղաղության համաձայնագիրը ստորագրել միաժամանակ։ Օրերս էլ Ադրբեջանի ԱԳՆ-ն հայտարարություն էր տարածել՝ նշելով, թե, իբր, ՀՀ վարչապետը ՀՀ Սահմանադրության ու Մինսկի խմբի լուծարման հարցերով «փորձում է մոլորեցնել միջազգային հանրությանը»։
Թարգմանությունը՝ Էմմա Չոբանյանի
