24.05.2026 | 13:46
«Բոլորին դեմ եմ» կուսակցության նախընտրական քարոզարշավը Գյումրիում. ՈՒՂԻՂ
Լեհաստանում նախագահական ընտրությունների 2-րդ փուլ կանցկացվի․ կմասնակցեն Վարշավայի քաղաքապետ Տշասկովկին և ընդդիմադիր Նավրոցկին
Քաղաքականություն
19.05.2025 | 12:33
Լեհաստանում մայիսի 18-ին անցկացված նախագահական ընտրություններում 13 թեկնածուներից ոչ ոք չի ստացել առաջին փուլում հաղթելու համար անհրաժեշտ 50%-ից ավելի ձայն։ Current time-ի փոխանցմամբ՝ նախագահական ընտրությունների երկրորդ փուլ կանցկացվի, որին կմասնակցեն Վարշավայի լիբերալ քաղաքապետ Ռաֆալ Տշասկովսկին և ընդդիմադիր պահպանողական «Օրենք և արդարություն» կուսակցության ներկայացուցիչ, Լեհաստանի ազգային հիշողության ինստիտուտի ղեկավար Կարոլ Նավրոցկին։
Քվեների 99%-ի հաշվարկից հետո Տշասկովսկին ստացել է ձայների 31,2%-ը, Նավրոցկին՝ 29,7%-ը։ Մասնակցությունը կազմել է գրեթե 67%։ Ընտրելու իրավունք ունեն շուրջ 29 միլիոն լեհեր։
Ընտրությունների երկրորդ փուլը նախատեսված է հունիսի 1-ին: Հաղթողը կփոխարինի հեռացող պահպանողական Անջեյ Դուդային, որի պաշտոնավարման ժամկետն ավարտվում է օգոստոսին:
Լեհաստանի նախագահական ընտրությունները համարվում են վճռորոշ երկրի քաղաքական վեկտորի տեսանկյունից։ Ըստ վերլուծաբանների՝ Տշասկովսկու հաղթանակն անհրաժեշտ է եվրոպամետ վարչապետ Դոնալդ Տուսկին՝ բարեփոխումներ իրականացնելու համար։
«Դժվար պայքար յուրաքանչյուր ձայնի համար։ Այս երկու շաբաթները կորոշեն մեր հայրենիքի ապագան»,- գրել է Տուսկը X սոցիալական ցանցում։
Եթե Նավրոցկին հաղթի, հնարավոր են արտահերթ խորհրդարանական ընտրություններ։ Նրա հնարավորությունները կարող են մեծանալ Սլավոմիր Մենցենի ընտրազանգվածի աջակցության շնորհիվ, որը երրորդ տեղում է՝ ձայների 14,8%-ով։ Նավրոցկին համակրում է ԱՄՆ նախագահ Դոնալդ Թրամփին և քննադատում ուկրաինացի փախստականներին։
Լեհաստանի նախագահն ընտրվում է հինգ տարի ժամկետով, ազդում է երկրի արտաքին քաղաքականության վրա, կառավարություն նշանակում։
Թարգմանությունը՝ Էմմա Չոբանյանի
