07.10.2026 | 13:32
Դելին ու Երևանը քննարկում են Հայաստանում Pinaka Mk-II-ի արտադրության և հավաքման հնարավորությունը․ հնդկական ԶԼՄ
Պուտինը վստահ է, որ ռուսական զորքերը կարող են տարեվերջին ամբողջությամբ գրավել Ուկրաինայի չորս շրջանները. Bloomberg
Քաղաքականություն
19.05.2025 | 12:59
ՌԴ նախագահ Վլադիմիր Պուտինը կարծում է, որ ինքն ամուր դիրքում է Դոնալդ Թրամփի հետ հեռախոսազրույցից առաջ, քանի որ եվրոպացի առաջնորդները փորձում են կանխել ԱՄՆ նախագահի կողմից գործարքի շտապողականությունը, գրում է Bloomberg-ը։
Պուտինը վստահ է, որ իր զորքերը կարող են տարեվերջին ճեղքել Ուկրաինայի պաշտպանությունը՝ լիակատար վերահսկողություն հաստատելով չորս շրջանների նկատմամբ, որոնք նա հայտարարել է Ռուսաստանի մաս, լրատվամիջոցին հայտնել է աղբյուրը՝ անանունության պայմանով։ Սա նշանակում է, որ Ռուսաստանի նախագահը, հավանաբար, որևէ նշանակալի զիջման չի գնա Թրամփին զրույցի ընթացքում, և եվրոպացի պաշտոնյաները մտահոգված են, որ Թրամփը կարող է փորձել հարկադրել կարգավորումը՝ անկախ ամեն ինչից։
ԱՄՆ նախագահը պնդում է պատերազմի արագ ավարտի հարցում, որն արդեն չորրորդ տարին է ընթանում։ Իր հերթին, Ռուսաստանի առաջնորդը որևէ նշան չի տվել, որ պատրաստ է դադարեցնել մարտերը, քանի որ իր զորքերը դանդաղորեն առաջ են շարժվում մարտի դաշտում, և դա մտահոգություն է առաջացրել Կիևում ու այլ եվրոպական մայրաքաղաքներում, որ Ուկրաինան կարող է ստիպված լինել զիջել ավելի շատ տարածքներ։
Ըստ հրապարակման՝ աճում է այն զգացողությունը, որ հրադադարի հաստատման ԱՄՆ-ի ջանքերը գագաթնակետին են հասնում, և Եվրոպայում պաշտոնյաները վստահ չեն՝ արդյո՞ք Թրամփը կուժեղացնի Ռուսաստանի վրա ճնշումը, թե՞ պարզապես կանցնի հաջորդ մարտահրավերին, եթե այդ ջանքերը ձախողվեն։ Թրամփը խոստացել է ռուս գործընկերոջ հետ զրույցն ավարտելուց հետո արդյունքներրի մասին տեղեկացնել Ուկրաինայի նախագահ Վլադիմիր Զելենսկիին և ՆԱՏՕ-ի որոշ դաշնակիցների։
Կրեմլին մոտ կանգնած երկու այլ աղբյուրների խոսքով՝ չնայած մարտական գործողությունները դադարեցնելու մասին բոլոր խոսակցություններին՝ Պուտինը պատրաստ է երկարատև պատերազմի, եթե դա է անհրաժեշտ իր նպատակներին հասնելու համար։
Ըստ եվրոպացի պաշտոնյայի՝ Գերմանիայի, Ֆրանսիայի և Մեծ Բրիտանիայի առաջնորդները ուրբաթ հեռախոսազրույցի ժամանակ փորձել են ԱՄՆ նախագահին հստակեցնել, որ Պուտինը նրան մոլորեցնում է։ Նրանք հույս ունեն, որ Թրամփը կհասկանա, որ պարտվողի դերում հայտնվելու վտանգի է ենթարկվում, եթե վատ գործարք պարտադրի Ուկրաինային։
Հավելենք, որ այսօր՝ մայիսի 19-ին նախատեսված է Պուտինի և Թրամփի հեռախոսազրույցը։
Ավելի վաղ Դոնալդ Թրամփը Truth Social սոցիալական ցանցում հայտարարել էր, որ մայիսի 19-ին մտադիր է հեռախոսազրույց ունենալ նախ Պուտինի, ապա Ուկրաինայի նախագահ Վլադիմիր Զելենսկիի և «ՆԱՏՕ-ի տարբեր անդամների» հետ։
Թարգմանությունը՝ Էմմա Չոբանյանի
