Քաղաքականություն
18.05.2025 | 19:50
Բաքվի և Երևանի միջև հարաբերությունների կարգավորման ուղղությամբ քայլեր են ձեռնարկվում, իրանական Tasnim գործակալությանը հայտնել է Ադրբեջանի նախագահի օգնական և նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը։
«…Ադրբեջանն ամբողջությամբ վերականգնել է իր տարածքային ամբողջականությունը։ Տարածաշրջանում ստեղծվել են խաղաղության համար շատ լավ, բարենպաստ պայմաններ։ Հարավային Կովկասում ի հայտ է եկել նոր ստատուս քվո, նոր իրականություն, և այս նոր ստատուս քվոն այլևս հիմնված չէ օկուպացիայի կամ ագրեսիայի վրա, այլ միջազգային իրավունքի նորմերի և սկզբունքների, լեգիտիմության վրա են հիմնված», – ասել է Հիքմեթ Հաջիևը։
Ադրբեջանի նախագահի օգնականը նշել է, որ «հինգ սկզբունքները, որոնք հիմք են հանդիսանում Հայաստանի հետ հարաբերությունների կարգավորման վերաբերյալ խաղաղության պայմանագրի, և նույնիսկ այս փաստաթղթի տեքստը, մշակվել են Ադրբեջանի կողմից և ներկայացվել հայկական կողմին»։
Հիքմեթ Հաջիևը հիշեցրել է, որ Բաքվի և Երևանի միջև խաղաղության պայմանագրի տեքստի վրա աշխատանքն ավարտվել է. «Դրական փաստն այն է, որ խաղաղության պայմանագրի տեքստի համաձայնեցման աշխատանքներն ավարտվել են։ Սակայն, միևնույն ժամանակ, Հայաստանի հետ երկկողմ հարաբերություններում կան բաց հարցեր։ Մենք կարծում ենք, որ Հայաստանը պետք է սահմանադրական հիմունքներով վերջ դնի Ադրբեջանի նկատմամբ բոլոր տարածքային պահանջներին, որպեսզի կարողանանք տարածաշրջանում հասնել կայուն, վերջնական խաղաղության»։
Ադրբեջան-Իրան հարաբերությունների վերաբերյալ Ադրբեջանի նախագահի օգնականը նշել է, որ դրանք թևակոխել են զարգացման նոր փուլ։
