13.01.2026 | 17:30
Դաշյանը վերադարձել է «Փյունիկ», «Արարատ-Արմենիան» նոր պայմանագրեր է կնքել առանցքային խաղացողների հետ
Կիևը հայտնում է ռուսական օդային հարձակման ժամանակ F-16 կործանիչի կորստի մասին
Քաղաքականություն
16.05.2025 | 11:33
Ուկրաինայի ռազմաօդային ուժերը հայտնել են մայիսի 16-ի առավոտյան ռուսական բանակի կողմից օդային հարձակման ժամանակ F-16 կործանիչի կորստի մասին։
«2025 թվականի մայիսի 16-ին, մոտավորապես ժամը 03:30-ին, կապը F-16 ինքնաթիռի հետ կորել է։ Ուկրաինական կործանիչը հակառակորդի օդային հարձակումը հետ մղելու առաջադրանք էր կատարում»,- ասվում է հաղորդագրության մեջ։
Նշվում է, որ նախնական տվյալներով՝ օդաչուն ոչնչացրել է երեք օդային թիրախ ու աշխատել չորրորդի ուղղությամբ, սակայն ինքնաթիռում արտակարգ իրավիճակ է ստեղծվել։ Օդաչուն ինքնաթիռը հեռացրել է բնակեցված տարածքից և հաջողությամբ կատապուլտացվել։
Որոնողական-փրկարարական խմբի արագ աշխատանքի շնորհիվ օդաչուն արագորեն հայտնաբերվել և տարհանվել է։ Նրա կյանքին և առողջությանը վտանգ չի սպառնում։
Հաղորդվում է, որ բոլոր հանգամանքներն օբյեկտիվորեն պարզաբանելու համար ստեղծվել է հանձնաժողով, այն արդեն սկսել է աշխատանքները։
Ապրիլի կեսերին էլ Ուկրաինայի ռազմաօդային ուժերի հրամանատարությունը հայտնել էր ուկրաինացի օդաչու, կապիտան Պավել Իվանովի մահվան մասին՝ F-16 կործանիչով մարտական առաջադրանք կատարելիս։ Նախագահ Վլադիմիր Զելենսկին հետմահու Իվանովին շնորհել է Ուկրաինայի հերոսի կոչում։
Ռուսաստանի պաշտպանության նախարարությունը նույնպես հայտնել էր ուկրաինական F-16-ի խոցման մասին՝ առանց մանրամասներ ներկայացնելու։
Ուկրաինան իր առաջին F-16-ներն արևմտյան դաշնակիցներից ստացել է 2024 թվականի ամռանը։
Թարգմանությունը՝ Էմմա Չոբանյանի
