13.01.2026 | 10:05
Լարս ավտոճանապարհը փակ է բոլոր տեսակի տրանսպորտային միջոցների համար
Անկարան չի փոխել դիրքորոշումը՝ ՆԱՏՕ-ն չպետք է լինի ռուս-ուկրաինական պատերազմի մաս․ Էրդողանն ընդունել է ՆԱՏՕ-ի գլխավոր քարտուղարին
Քաղաքականություն
13.05.2025 | 23:29
Թուրքիայի նախագահ Ռեջեփ Թայիփ Էրդողանն Անկարայում նախագահական համալիրում հանդիպել է ՆԱՏՕ-ի գլխավոր քարտուղար Մարկ Ռյուտեի հետ։ Թուրքական կողմի հաղորդմամբ՝ հանդիպման ընթացքում քննարկվել են Թուրքիա-ՆԱՏՕ հարաբերությունները, Ռուսաստան-Ուկրաինա պատերազմի շուրջ զարգացումները, ինչպես նաև տարածաշրջանային և համաշխարհային հարցեր։
Հանդիպման ընթացքում Էրդողանը նշել է, որ Թուրքիան մեծ նշանակություն է տալիս ՆԱՏՕ-ին և, որպես դրա ապացույց, կրկին կստանձնի ՆԱՏՕ-ի Կոսովոյի ուժերի հրամանատարությունը։
Նշելով, որ Թուրքիան ակնկալում է համագործակցություն իր դաշնակիցներից ահաբեկչության դեմ պայքարում, նա նաև ընդգծել է, որ Թուրքիան շարունակելու է անել ամեն ինչ՝ ապահովելու համար, որ ՆԱՏՕ-ն մնա ուժեղ՝ չնայած ներքին և արտաքին մարտահրավերներին։
«Հայտարարելով, որ Թուրքիան ակտիվացնում է իր ջանքերը՝ ռուս-ուկրաինական պատերազմում տևական և արդար խաղաղություն ապահովելու համար, նախագահ Էրդողանը հայտարարել է, որ քննարկումներ է ունեցել Ռուսաստանի նախագահ Պուտինի և Ուկրաինայի նախագահ Զելենսկիի հետ, հավելել է, որ Թուրքիան վճռականորեն աջակցում է համապարփակ հրադադարի հաստատմանը, պահպանում է իր դիրքորոշումը, որ ՆԱՏՕ-ն չպետք է մասնակցի այս պատերազմին և ընդգծել է, որ խաղաղության հնարավորությունը չպետք է բաց թողնել»,- ասվում է հաղորդագրության մեջ։
Հանդիպմանը Էրդողանին ուղեկցել են Թուրքիայի արտաքին գործերի նախարար Հաքան Ֆիդանը և նախագահի արտաքին քաղաքականության և անվտանգության հարցերով գլխավոր խորհրդական Ակիֆ Չաղաթայ Քըլըչը։
Հավելենք, որ մայիսի 14-16-ը թուրքական Անթաիայում տեղի է ունենալու ՆԱՏՕ-ի ԱԳ նախարարների ոչ պաշտոնական հանդիպումը։
Թարգմանությունը՝ Էմմա Չոբանյանի
