Թրամփի բանագնացներ Ուիթկոֆն ու Քելլոգը մեկնում են Ստամբուլ՝ ռուս-ուկրաինական բանակցությունների մասնակցելու․ ԱՄՆ նախագահի այցի հարցը բաց է մնում

ԱՄՆ նախագահ Դոնալդ Թրամփի հատուկ բանագնացներ Սթիվ Ուիթկոֆն ու Քիթ Քելլոգը մայիսի 15-ին կմեկնեն Ստամբուլ  ռուս-ուկրաինական հնարավոր բանակցություններին՝ Ուկրաինայում Ռուսաստանի սանձազերծած պատերազմնավարտելու ը։ Այս մասին Reuters-ին հայտնել է ծրագրերին ծանոթ երեք աղբյուր։ Այլ մանրամասներ չեն հրապարակվել։

CNN-ն էլ, ԱՄՆ վարչակազմում իր աղբյուրներին վկայակոչելով, գրում է, որ Քելլոգը և Ուիթքոֆը պլանավորում են մասնակցել Ռուսաստանի և Ուկրաինայի միջև Ստամբուլում կայանալիք հնարավոր բանակցություններին, սակայն հանդես են գալու  դիտորդի կարգավիճակում։ Միաժամանակ, ԱՄՆ նախագահ Դոնալդ Թրամփի՝ Ստամբուլ կատարելիք այցի հարցը մնում է բաց։ Սպիտակ տան բարձրաստիճան պաշտոնյան ասել է, որ դա կախված է այն հանգամանքից՝ արդյո՞ք ՌԴ նախագահ Վլադիմիր Պուտինը կմասնակցի բանակցություններին։

Նախօրեին Թրամփը հայտարարել էր, որ կարող է մեկնել Ստամբուլ, որտեղ մայիսի 15-ին, հնարավոր է, տեղի ունենա  Ուկրաինայի նախագահ Վլադիմիր Զելենսկիի և ՌԴ նախագահ Վլադիմիր Պուտինի հանդիպումը։

Ավելի վաղ Ուկրաինայի նախագահ Վլադիմիր Զելենսկին նշել էր, որ պատրաստ է ուղիղ բանակցություններ վարել Վլադիմիր Պուտինի հետ հինգշաբթի՝ մայիսի 15-ին։Ուկրաինայի նախագահի գրասենյակի ղեկավարի խորհրդական Միխայիլ Պոդոլյակն էլ  այսօր հայտարարել էր, որ նախագահ Վլադիմիր Զելենսկին պատրաստ է Ստամբուլում հնարավոր բանակցությունների ժամանակ խոսել միայն Ռուսաստանի նախագահ Վլադիմիր Պուտինի հետ։

Կրեմլը դեռևս չի հրապարակել պատվիրակության կազմը, սակայն Ռուսաստանի նախագահի մամուլի քարտուղար Դմիտրի Պեսկովը հայտնել է, որ դա տեղի կունենա, «երբ նախագահն անհրաժեշտ համարի»։

Թարգմանությունը՝ Էմմա Չոբանյանի