07.10.2026 | 23:48
Արթուր Դանիելյանը կալանավորվեց
ICAO-ն ՌԴ-ին մեղավոր է ճանաչել մալայզիական Boeing MH17-ի կործանման մեջ
Քաղաքականություն
13.05.2025 | 11:59
Քաղաքացիական ավիացիայի միջազգային կազմակերպության (ICAO) խորհուրդը Ռուսաստանին պաշտոնապես մեղավոր է ճանաչել 2014 թվականին մալայզիական Boeing MH17-ի կործանման մեջ։ Այս մասին հայտնել է Նիդերլանդների կառավարությունը։
Նշվում է, որ Ռուսաստանը պատասխանատու է MH17 չվերթի ինքնաթիռի կործանման համար, այն խախտել է Չիկագոյի միջազգային քաղաքացիական ավիացիայի մասին կոնվենցիան։ ICAO-ի խորհուրդն այս որոշումը կայացրել է 2022 թվականին Նիդերլանդների և Ավստրալիայի կողմից ՌԴ-ի դեմ հարուցված գործով՝ 2014 թվականի հուլիսի 17-ին MH17 չվերթի կործանման համար։ Այս որոշմումը հաստատել է Նիդերլանդների ու Ավստրալիայի դիրքորոշումը։
«Ես ողջունում եմ ICAO Խորհրդի որոշումը, առաջին հերթին, MH17 չվերթի զոհերի ընտանիքների համար։ Որոշումը չի կարող վերացնել նրանց վիշտն ու տառապանքը, բայց դա կարևոր քայլ է MH17 չվերթի բոլոր զոհերի և նրանց ընտանիքների համար ճշմարտության բացահայտման, արդարադատության և պատասխանատվության հասնելու ուղղությամբ։ Բացի այդ, այս որոշումը հստակ ազդանշան է միջազգային հանրությանը, որ պետությունները չեն կարող խախտել միջազգային իրավունքը առանց հետևանքների»,- ասել է Նիդերլանդների ԱԳ նախարար Կասպար Վելդկամպը։
Հաղորդվում է, որ առաջիկա շաբաթների ընթացքում ICAO-ի խորհուրդը կքննարկի, թե ինչպես պետք է փոխհատուցվի վնասը։ Այս կապակցությամբ Նիդերլանդները և Ավստրալիան խորհրդին խնդրում են՝ պարտավորեցնել Ռուսաստանի Դաշնությանը բանակցություններ սկսել Նիդերլանդների և Ավստրալիայի հետ այդ հարցի շուրջ և վերահսկել գործընթացը։
ICAO-ն ՄԱԿ-ի մասնագիտացված գործակալություն է, որն ունի 193 անդամ երկիր։ Չիկագոյի կոնվենցիայի համաձայն՝ այդ երկրներին արգելվում է թռիչքի ժամանակ զենք օգտագործել քաղաքացիական ինքնաթիռների դեմ։ Խորհուրդը կարող է որոշել՝ արդյո՞ք երկրները խախտել են Չիկագոյի կոնվենցիան։
Հիշեցնենք, որ Malaysia Airlines-ի ուղևորատար Boeing-ը Դոնբասի երկնքում խփվել էր 2014 թվականի հուլիսի 17-ին։ Աղետը խլել է 298 մարդու կյանք՝ 17 երկրի քաղաքացիների, զոհերի գրեթե երկու երրորդը Նիդերլանդների քաղաքացիներ էին։
Հաագայի դատարանը որոշել է, որ ինքնաթիռը խփվել է ռուսական արտադրության «Բուկ» հրթիռով։ 2022 թվականի նոյեմբերին Նիդերլանդներում դատարանը հեռակա կարգով ցմահ ազատազրկման է դատապարտել ինքնահռչակ ԴԺՀ-ի նախկին պաշտպանության նախարար Իգոր Ստրելկովին ու ևս երկու անձի՝ ինքնաթիռը դիտավորյալ խոցելու և կանխամտածված սպանության մեղադրանքով։ Գործով մեկ այլ մեղադրյալ արդարացվել է։
2024 թվականի հունիսին Ռուսաստանը դուրս էր եկել Քաղավիացիայի միջազգային կազմակերպության խորհրդում Ավստրալիայի և Նիդերլանդների հետ Boeing MH17-ի կործանման վերաբերյալ վեճից։
Թարգմանությունը՝ Էմմա Չոբանյանի
