25.08.2026 | 21:53
Սեպտեմբերի 1-ից դպրոցների հարակից տարածքներում ոստիկանությունը կանցկացնի ուժեղացված ծառայություն
Ծխախոտ արտադրողները մեծ հաճույքով վճարում են 400 000 դրամ տուգանք՝ խախտում են, վճարում․ Պապոյան․ ՏԵՍԱՆՅՈՒԹ
Տնտեսություն
05.05.2025 | 12:19
ԱԺ տնտեսական հարցերի մշտական հանձնաժողովի նիստում Էկոնոմիկայի նախարար Գևորգ Պապոյանը հիշեցրեց, որ 2024 թվականի հունվարի 1-ից ՀՀ-ում ուժի մեջ է մտել ԵԱՏՄ կանոնակարգը, որը վերաբերում է ծխախոտային արտադրանքի տեխնիկական պահանջներին, ըստ որոնց ծխախոտի տուփերի վրա պետք է տեղադրվեն գրաֆիկական նախազգուշացումներով պատկերներ։ Պապոյանի խոսքով, սակայն, մի շարք տեղական արտադրողներ այդպես էլ չեն համապատասխանեցրել իրենց արտադրանքը սահմանված պահանջներին։
«Շարունակում էին արտադրել և շրջանառության մեջ դնել հին տուփերով ծխախոտներ՝ առանց գրաֆիկական նախազգուշացումների։ Խնդիրը շարունակաբար չէր լուծվում։ Հասկացանք, որ սա անարդար գործելակերպ է, ինչը թե՛ սպառողների, թե՛ մրցակիցների նկատմամբ անհարգալից վերաբերմունք է։ Ներկա կարգավորմամբ նման իրավախախտման համար նախատեսված 400 հազար դրամ տուգանքը չի համարվում էական ֆինանսական բեռ տնտեսվարողի համար և նպաստում է անօրինական գործելակերպի շարունակությանը»,- նկատեց նախարարը։
Պապոյանը հայտնեց, որ մրցակցային միջավայր ապահովելու համար վարչական իրավախախտումների վերաբերյալ ՀՀ օրենսգրքում փոփոխության առաջարկ է ներկայացվել՝ տուգանքը գանձել իրավախատման նախորդ տարվա հասույթի 1%-ի չափով։
«Տնտեսվարողներն ընդունում են, որ խախտում են կատարել և մեծ հաճույքով վճարում են 400 հազար տուգանքը։ Այսինքն՝ այո՛, խախտել ենք, տուգանքը վճարեցինք, խախտել ենք, վճարեցինք։ Երբ տուգանքի ծավալը մեծացնենք, չեն խախտի, կամ այնքան գումար կվճարեն, որ տված վնասը կփոխհատուցվի»,-հայտարարեց նախարարության պատասխանատուն։
Մանրամասները՝ տեսանյութում։
