Պակիստանը հայտարարում է, թե Հնդկաստանը մտադիր է ռազմական գործողություններ սկսել «24-36 ժամվա ընթացքում»

Հնդկաստանը մտադիր է հարված հասցնել Պակիստանին «հաջորդ 24-36 ժամվա ընթացքում»՝ երկրների միջև լարվածության սրման ֆոնին։ Այս մասին հայտարարել է Պակիստանի տեղեկատվության և հեռարձակման նախարար Աթթաուլլահ Թարարը՝ հղում անելով «հավաստի հետախուզական տվյալներին»։

«Պակիստանը հավաստի հետախուզական տվյալներ ունի, որ Հնդկաստանը մտադիր է ռազմական գործողություններ սկսելլ Պակիստանի դեմ առաջիկա 24-36 ժամվա ընթացքում՝ Փահալգամի միջադեպին մասնակցության անհիմն և հորինված մեղադրանքների պատրվակով։ Հնդկաստանի՝ տարածաշրջանում դատավորի, ատենակալի և դահիճի ինքնագոհ դերն անխոհեմ է ու կտրականապես մերժվում է։ Պակիստանն ինքը դարձել է ահաբեկչության զոհ և իսկապես հասկանում է այդ ցավը։ Մենք միշտ դատապարտել ենք այն՝ իր բոլոր ձևերով և դրսևորումներով աշխարհի ցանկացած վայրում»,- գրել է Թարարը X-ի իր միկրոբլոգում։

Նա նշել է, թե պատասխանատու պետություն լինելով՝ Պակիստանն անկեղծորեն առաջարկել է հավաստի, թափանցիկ և անկախ հետաքննություն անցկացնել չեզոք փորձագետների հանձնաժողովի կողմից՝ ճշմարտությունը պարզելու համար։

Ըստ պակիստանցի պաշտոնյայի՝ հավաստի հետաքննություններից խուսափելն ինքնին բավարար ապացույց է Հնդկաստանի իրական դրդապատճառները բացահայտելու համար։

«Պակիստանը վերահաստատում է, որ Հնդկաստանի կողմից ցանկացած նման ռազմական արկածախնդրության անպայման և վճռականորեն կպատասխանի։ Միջազգային հանրությունը պետք է գիտակցի այն իրողությունը, որ լարվածության սրման և դրա հետևանքների պատասխանատվությունն ուղղակիորեն ընկնելու է Հնդկաստանի վրա։ Ազգը վերահաստատում է իր վճռականությունը՝ ցանկացած գնով պաշտպանելու Պակիստանի ինքնիշխանությունն ու տարածքային ամբողջականությունը»,- ասվում է գրառման մեջ։

Ավելի վաղ էլ Պակիստանի պաշտպանության նախարար Խավաջա Մուհամմադ Ասիֆը Reuters-ին տված հարցազրույցում հայտարարել էր, որ հարևան Հնդկաստանի կողմից ռազմական ներխուժումն անխուսափելի է։ Պակիստանցի բարձրաստիճան զինվորականը նշել է, որ Հնդկաստանի հռետորաբանությունը սրվում է, և որ Պակիստանի զինվորականները կառավարությանը տեղեկացրել են Հնդկաստանի կողմից հարձակման հնարավորության մասին: Նա, սակայն, չէր մանրամասնել, թե ինչու է կարծում, որ ներխուժումն անխուսափելի է։

«Պակիստանը բարձր պատրաստվածության վիճակում է, բայց կօգտագործի իր միջուկային զենքը միայն այն դեպքում, եթե մեր գոյությանն ուղղակի սպառնալիք լինի»,- հավելել էր Ասիֆը։

Հիշեցնենք, որ Հնդկաստանի և Պակիստանի միջև տասնամյակներ շարունակվող հակամարտությունը սրվել է այն բանից հետո, երբ ապրիլի 22-ին Հնդկաստանի Փահալգամ զբոսաշրջային քաղաքում զինյալների խմբի կողմից իրականացված հարձակման հետևանքով սպանվել է 26 մարդ։ Զոհվածների մեծ մասը զբոսաշրջիկներ են։ Հարձակման պատասխանատվությունը ստանձնել է Պակիստանի կողմից աջակցվող Դիմադրության ճակատ (TRF) ապստամբական խմբավորումը, որը Հնդկաստանում համարվում է ահաբեկչական։ Հարձակումից հետո Հնդկաստանի իշխանությունները հրամայել էին Պակիստանի բոլոր քաղաքացիներին լքել երկիրը մինչև ապրիլի 29-ը, նույնիսկ եթե նրանք այդ ամսաթվին վավեր վիզաներ ունեն։

Բացի այդ, Հնդկաստանի կառավարությունը հրամայել էր անհապաղ կասեցնել Պակիստանի հետ ջրային ռեսուրսների բաժանման մասին համաձայնագրի՝ 1960 թվականի Ինդոսի ջրերի մասին պայմանագրի գործողությունը։ Ի պատասխան՝ Իսլամաբադը նշել էր, որ Հնդկաստանի կողմից հարևանի ջրամատակարարումը դադարեցնելու ցանկացած փորձ կհամարի «պատերազմական ակտ», նաև հայտարարել դիվանագիտական միջոցների կիրառման մասին։

Թարգմանությունը՝ Էմմա Չոբանյանի