18.02.2026 | 21:15
Ծափաթաղում սպանված Տիգրանի քույրն ու եղբայրները 4 ամիս անց վերադարձել են մոր մոտ
Լավրովը նշել է ուկրաինական հակամարտության կարգավորման ռուսական պայմանները
Քաղաքականություն
28.04.2025 | 16:40
Ռուսաստանն Ուկրաինայի չեզոք, ոչ դաշինքային կարգավիճակը և այնտեղ «նացիստական ռեժիմի հետևանքների հաղթահարումը» համարում է ճգնաժամի լուծման երկու անհրաժեշտ պայմանները։ Այս մասին հայտարարել է Ռուսաստանի արտաքին գործերի նախարար Սերգեյ Լավրովը, գրում է ՌԻԱ Նովոստին։
«Մեր դիրքորոշումը կարգավորման վերաբերյալ լավ հայտնի է։ Մենք ելնում ենք այն փաստից, որ ՆԱՏՕ-ին Կիևի չանդամակցելը, նրա կողմից չեզոք և ոչ բլոկային կարգավիճակի հաստատումը՝ համաձայն 1990 թվականին Ուկրաինայի պետական ինքնիշխանության հռչակագրի, ուկրաինական ճգնաժամի վերջնական կարգավորման երկու հիմքերից մեկն է, որը համապատասխանում է Ռուսաստանի անվտանգության շահերին։ Երկրորդը Կիևում 2014 թվականի փետրվարին տեղի ունեցած հեղաշրջման արդյունքում ձևավորված նեոնացիստական ռեժիմի կառավարման հետևանքների հաղթահարումն է, ներառյալ ռուսական ամեն ինչի՝ լեզվի, լրատվամիջոցների, մշակույթի, ավանդույթների, կանոնական ուղղափառության օրենսդրական և ֆիզիկապես ոչնչացման գործողությունները»,- ասել է նա բրազիլական O Globo պարբերականին տված հարցազրույցում։
Լավրովը հայտարարել է, թե «պարտադիր պայման պետք է լինի նաև Ռուսաստանի նկատմամբ սահմանված պատժամիջոցների չեղարկումը և Ղրիմի, Դոնեցկի ու Լուգանսկի, ինչպես նաև Զապորոժիեի և Խերսոնի մարզերի ռուսական պատկանելության միջազգային ճանաչումը»։ Ըստ նրա՝ Ռուսաստանը նաև կփնտրի հուսալի երաշխիքներ ՆԱՏՕ-ից, ԵՄ-ից և «արևմտյան սահմաններին գտնվող առանձին անդամ պետություններից» բխող սպառնալիքների դեմ։
Հիշեցնենք, որ 2014 թվականին ՌԴ-ն բռնակցել էր Ղրիմը, նաև Դոնեցկի ու Լուգանսկի որոշ մասերի նկատմամբ հսկողություն հաստատել։ 2022-ի փետրվարի Ուկրաինա լայնամասշտաբ նեխուժումից հետո ՌԴ-ն Դոնեցկի ու Լուգանսկի շրջանները ամբողջությամբ է գրավել, ինչպես նաև Զապորոժիեի ու Խերսոնի շրջանների տարածքերը ոչ ամբողջությամբ։ Մոսկվան ուկրաինական այս շրջանները ներառել է ՌԴ-ի կազմում։
Վերջին շրջանում միջազգային լրատվամիջոցները նաև տեղեկություններ են տարածում, որ ուկրաինական կարգավորման ամերիկյան ծրագիրը ներառում է ՌԴ-ի կողմից ուկրաինական բռնակցված շրջանների ճանաչում։
ԱՄՆ նախագահ Դոնալդ Թրամփն էլ կրկին Ղրիմից էր խոսել և հայտարարել, թե կարծում է՝ Ուկրաինայի նախագահ Վլադիմիր Զելենսկին պատրաստ է Ղրիմը զիջել Ռուսաստանին՝ որպես խաղաղության համաձայնագրի մաս, չնայած նման ցանկացած առաջարկ Կիևի կողմից նախկինում մերժվել է։
Ուկրաինան բազմիցս մերժել է որևէ տարածքային զիջում՝ ընդգծելով, որ տարածքային հարցերը պետք է քննարկվեն միայն հրադադարի համաձայնեցումից հետո։ Զելենսկին էլ բազմիցս հայտարարել է, որ Ուկրաինան չի պատրաստվում հրաժարվել Ղրիմի նկատմամբ իր պահանջներից, այդ թվում՝ այն պատճառով, որ թերակղզու՝ երկրի կազմում լինելը ամրագրված է երկրի Սահմանադրությամբ։
Թարգմանությունը՝ Էմմա Չոբանյանի
