ՀՀ-ի և Ադրբեջանի միջև քննարկումներ են ընթանում հարաբերությունների կարգավորման ուղղությամբ․ Ալիևը՝ Կալլասին

Եվրամիությունը բարձր է գնահատում Ադրբեջանի հետ հարաբերությունները և հետաքրքրված է դրանց հետագա զարգացմամբ։ Այս մասին ասել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ, Եվրահանձնաժողովի փոխնախագահ Կայա Կալլասը Բաքվում Ադրբեջանի նախագահ Իլհամ Ալիևի հետ հանդիպմանը։ Ընդգծելով Եվրամիության և Ադրբեջանի միջև էներգետիկայի ոլորտում շատ հաջող համագործակցությունը՝ նա նշել է, որ երկիրը հանդես է գալիս որպես հուսալի գործընկեր Եվրոպայի էներգետիկ անվտանգության ապահովման գործում։

Ալիևն իր հերթին նշել է, որ Ադրբեջանը Եվրամիության հուսալի գործընկերն է, անդրադարձել արդեն 4 տարի գործող Հարավային գազային միջանցքի նշանակալի դերին Եվրոպա գազ մատակարարելու գործում։

Ադրբեջանի ղեկավարն ընդգծել է՝ Բաքուն արդեն գազ է մատակարարում 10 եվրոպական երկրների, այդ թվում՝ ԵՄ անդամ 8 երկրների: Իլհամ Ալիևը նշել է, որ գազի մատակարարման աշխարհագրական ծածկույթի առումով Ադրբեջանը եվրոպական տարածք գազով մատակարարող առաջին երկրներից մեկն է։

Նշելով, որ Ադրբեջանի և Եվրամիության միջև Հարավային գազային միջանցքի խորհրդատվական խորհրդի շրջանակներում հաստատվել է հաջող և արդյունավետ երկխոսություն, Ալիևը նաև նշել է վերականգնվող էներգիայի ոլորտում համագործակցության մեծ հնարավորությունների առկայությունը՝ շեշտելով, որ Ադրբեջանը Կասպից ծովի ադրբեջանական հատվածում ունի քամու էներգիայի հարուստ պաշարներ։ Ալիևը նաև ընդգծել է՝ Ադրբեջանը, Կենտրոնական Ասիայի երկրների հետ միասին, կարևոր դեր է խաղում վերականգնվող էներգիայի անդրկասպյան միջանցքի զարգացման և Սև ծովի ուղղությամբ նախագծերի իրականացման գործում, որոնց միացել են նաև Վրաստանը, Ռումինիան, Հունգարիան, վերջերս՝ Բուլղարիան։

Հանդիպմանը քննարկվել է նաև Հայաստանի հետ հարաբերությունների հարցը։ Մասնավորապես, ըստ ադրբեջանական կողմի հաղորդագրության, զրույցի ընթացքում մտքերի փոխանակում է տեղի ունեցել Հարավային Կովկասի տարածաշրջանում երկարատև կայունության ապահովման հարցերի շուրջ։

Ալիևը նշել է, որ Հայաստանի և Ադրբեջանի միջև երկկողմանի հիմքով քայլեր են ձեռնարկվում և քննարկումներ են ընթանում հարաբերությունների կարգավորման ուղղությամբ։

Թարգմանությունը՝ Էմմա Չոբանյանի