Լոնդոնում ուկրաինական հարցով հանդիպման մակարդակն իջեցվել է, արտգործնախարարների հանդիպումը հետաձգվել է

Մեծ Բրիտանիայի կառավարությունը հայտնել է, որ Ուկրաինայի վերաբերյալ խաղաղ բանակցությունները, որոնք պետք է անցկացվեին Լոնդոնում այսօր և որոնց պետք է մասնակցեին արտաքին գործերի նախարարները` հետաձգվել են, հաղորդում է BBC-ն:

Սակայն ավելի ցածր մակարդակի պաշտոնյաների հանդիպումը տեղի կունենա, փոխանցել է AFP գործակալությունը:

«Ուկրաինայի խաղաղ բանակցությունների հարցով նախարարական հանդիպումն այսօր հետաձգվում է։ Պաշտոնական մակարդակի բանակցությունները կշարունակվեն», – գործակալությանը հայտնել է Մեծ Բրիտանիայի Արտաքին գործերի նախարարությունը:

Ուկրաինայի նախագահի գրասենյակի ղեկավար Անդրեյ Երմակն իր հերթին տելեգրամյան ալիքում հայտնել է. «Լոնդոն ենք ժամանել պաշտպանության նախարար Ռուստեմ Ումերովի և արտաքին գործերի նախարար Անդրեյ Սիբիգայի հետ միասին։ Աշխատելու ենք հանուն խաղաղության»:

«Ինչպես պայմանավորվել էինք Փարիզում, այսօր կհանդիպենք Լոնդոնում գտնվող ամերիկացի և եվրոպացի գործընկերների հետ», – գրել է Զելենսկիի գրասենյակի ղեկավարը։ «Խաղաղության ուղին հեշտ չէ, բայց Ուկրաինան միշտ եղել և մնում է խաղաղության ջանքերին նվիրված», – հավելել է Երմակը:

Բրիտանական The Daily Telegraph-ը հայտնել էր, որ Լոնդոնում կայանալիք հանդիպմանն ԱՄՆ-ն պետք է ներկայացներ յոթ կետից բաղկացած կարգավորման ծրագիր, որը ներառում է ԱՄՆ-ի կողմից Ղրիմի նկատմամբ Ռուսաստանի ինքնիշխանության ճանաչումը։ Սակայն Ուկրաինայի նախագահը ապրիլի 22-ին մերժել է առաջարկը: Զելենսկիի այս հայտարարությունից հետո ԱՄՆ պետքարտուղար Մարկո Ռուբիոն չեղարկել է իր ուղևորությունը Մեծ Բրիտանիա։