09.08.2026 | 13:13
Դաշտավանում ծեծկռտուք է եղել․ մասնակիցները հարվածել են քարերով, մահակներով և կռփազենքով
Թբիլիսին պատրաստ է նպաստել Երևանի և Բաքվի միջև խաղաղ համաձայնագրի կնքմանը. Բոճորիշվիլի
Քաղաքականություն
22.04.2025 | 12:52
Վրաստանը ողջունում է Հայաստանի և Ադրբեջանի միջև խաղաղության համաձայնագրի տեքստի հաստատումը և պատրաստ է նպաստել տարածաշրջանում խաղաղության և համագործակցության ամրապնդմանը։
Ինչպես հաղորդում են ադրբեջանական լրատվականները, այս մասին Վրաստանի արտգործնախարար Մակա Բոճորիշվիլին հայտարարել է ԵԱՀԿ գլխավոր քարտուղար Ֆերիդուն Սինիրլիօղլուի հետ համատեղ ճեպազրույցում։ Նրա խոսքով՝ Վրաստանն անկեղծորեն ցանկանում է նպաստել Հարավային Կովկասի տարածաշրջանում խաղաղությանն ու կայունությանը։
«Ուրախ եմ, որ անցյալ շաբաթ Թբիլիսիում տեղի ունեցավ Վրաստանի, Ադրբեջանի և Հայաստանի փոխարտգործնախարարների եռակողմ հանդիպումը: Հուսով եմ, որ այս ձևաչափով մենք կկարողանանք համագործակցել տարածաշրջանի բարգավաճման համար»,- նշել է նա։
Բոճորիշվիլին նաև հավելել է, որ Վրաստանը մեծ նշանակություն է տալիս տարածաշրջանային համագործակցությանը, հատկապես այն նախագծերի իրականացմանը, որոնք կնպաստեն տնտեսական զարգացմանը։
Հիշեցնենք, ապրիլի 17-ին Թբիլիսիում կայացավ Վրաստանի, Հայաստանի և Ադրբեջանի փոխարտգործնախարարներ Լաշա Դարսալիայի, Վահան Կոստանյանի և Էլնուր Մամեդովի եռակողմ հանդիպումը։
Հայաստանի արտգործնախարարության տարածած հայտարարության համաձայն՝ հանդիպումը կազմակերպվել էր ՀՀ արտգործնախարար Արարատ Միրզոյանի, Վրաստանի արտգործնախարար Մակա Բոճորիշվիլիի ևԱդրբեջանի արտգործնախարար Ջեյհուն Բայրամովի նախաձեռնությամբ։
Ըստ հաղորդագրության՝ կողմերը հանդիպման մեկնարկին ողջունել էին հարավկովկասյան երեք երկրների առաջին եռակողմ հանդիպումը և ընդգծել, որ երեք երկրներն ունեն միմյանց ինքնիշխանության և տարածքային ամբողջականության նկատմամբ հարգանքի վրա հիմնված համագործակցության չիրացված ներուժ։
