Ավինյանին հրավիրել են ԱԺ. ՔՊ-ականներն անակնկալի են եկել քաղաքացիներին տուգանելու նոր առաջարկից

Երևանի քաղաքապետ Տիգրան Ավինյանին ԱԺ իշխող «Քաղաքացիական պայմանագիր» խմբակցությունը հրավիրել էր փակ քննարկման։ Factor.am-ին հայտնի դարձավ, որ օրակարգում օրերս ԱԺ պետաիրավական հարցերի մշտական հանձնաժողովում քննարկված նախագիծն է, որով առաջարկվում է տուգանել այն քաղաքացիներին, որոնք խախտումներ թույլ կտան հասարակական տրանսպորտից օգտվելու ընթացքում։

Մասնավորապես, նախագծով ուղևորները պարտավոր են տրանսպորտային միջոց նստելուց անմիջապես հետո վճարել ուղեվարձը եւ վավերացված տոմսը հսկիչների պահանջի դեպքում տրամադրել՝ այն ստուգելու նպատակով, իսկ եթե չներկայացնեն՝ կտուգանվեն:

Չվճարելու կամ տոմս ունենալու, բայց չվավերացնելու դեպքում տուգանքը 10 հազար դրամ է, եթե արտոնություն ունեցող անձի փոխարեն երթևեկի այլ անձ, տուգանվելու է 15 հազար դրամով: Այս նախագիծը շրջանառվեց քաղաքացիների բոյկոտի ֆոնին, երբ որոշները սկսեցին չվճարել 150 դրամ` նախկին 100-ի փոխարեն։

Տեղեկացանք, որ այս նախաձեռնությունը անակնկալ է եղել ՔՊ-ական պատգամավորների համար, նրանք նախապես տեղյակ չեն եղել

Տիգրան Ավինյանի այս առաջարկի մասին, ուստի այսօր Երևանի քաղաքապետին հրավիրել են խորհրդարան՝ պարզաբանումներ ստանալու նպատակով։

Փակ հանդիպումը տևեց շուրջ երկու ժամ, տեղեկացանք, որ Ավինյանը պատասխանել է մի քանի տասնյակ հարցերի։ Քննարկումից հետո նա խուսափեց այս թեմայի վերաբերյալ Factor.am-ի հարցերին պատասխանել։

Մեզ հայտնի դարձավ, որ պատգամավորներին որպես պարզաբանում ներկայացվել է այն, որ նախագիծը քաղաքապետարանը քննարկել է կառավարության գործընկերների հետ։

Իշխող ուժը երկու ամսով հետաձգել է նախագծի քննարկումը։ Թե այս հանդիպումից եւ Ավինյանի ներկայացրած պարզաբանումներից հետո ինչ որոշում կկայացվի՝ հայտնի չէ։

Նարեկ Կիրակոսյան