Քաղաքականություն
16.04.2025 | 15:17
«Եթե այսօր մենք խոսում ենք Եվրոպայի էներգետիկ անվտանգության մասին, ապա այն անհնար է պատկերացնել առանց Ադրբեջանի և Վրաստանի»,- ադրբեջանական լրատվամիջոցների հաղորդմամբ՝ այս մասին հայտարարել է Ադրբեջանի նախագահ Իլհամ Ալիևը Բաքվում Վրաստանի նախագահ Միխեիլ Ղավելաշվիլիի հետ հանդիպումից հետո։
«Ներկայումս Ադրբեջանը բնական գազ է արտահանում 12 երկիր, այդ թվում՝ Վրաստան, և այդ արտահանումն իրականացվում է Վրաստանի միջոցով»,-ասել է Ալիևը՝ ընդգծելով, որ տրանսպորտի և կապի ոլորտում ձեռքբերումները, նոր երկաթուղիների և նավահանգիստների կառուցումը «մեծ սիներգիա են ստեղծել ինչպես Ադրբեջանում, այնպես էլ՝ Վրաստանում և դարձել են Միջին միջանցքի անբաժանելի մասը»։
Նա նաև նշել է, որ դարեր շարունակ երկու ժողովուրդները ապրել են խաղաղության, բարիդրացիության, եղբայրության պայմաններում, որը շարունակվում է մինչ օրս։
«Վրաստանն ու Ադրբեջանը համատեղ իրականացնում են բազմաթիվ կարևոր նախագծեր, որոնք մեծ նշանակություն ունեն ինչպես մեր երկրների ու ժողովուրդների, այնպես էլ ավելի լայն աշխարհագրության համար», – ասել է Ադրբեջանի ղեկավարը։
Խոսելով Հարավային Կովկասում խաղաղությունից՝ Ալիևը, մասնավորապես, հայտարարել է․ «Հարավային Կովկասում խաղաղության և անվտանգության հաստատումը նույնպես մեր ընդհանուր շահերից է բխում, և այստեղ իրենց ներդրումն ունեն և՛ Վրաստանը, և՛ Ադրբեջանը։ Դժբախտաբար, երկար տարիներ Հարավային Կովկասը հանդիսանում էր հակամարտության և պատերազմի ասպարեզ։ Հուսով եմ, որ այսուհետ Հարավային Կովկասի սև էջերը կփակվեն և կմնան պատմության մեջ»։
Թարգմանությունը՝ Էմմա Չոբանյանի
