Ըստ ռուսական կողմի՝ Կուրսկը ենթարկվել է ուկրաինական ԱԹՍ-ների զանգվածային հարձակման

Կուրսկի վրա ուկրաինական անօդաչու սարքերի հարձակման հետևանքով մեկ քաղաքացիական անձ զոհվել է, ինը մարդ վիրավորվել է։ Այս մասին հայտնել է Կուրսկի մարզի օպերատիվ շտաբը տելեգրամի իր ալիքում, գրում է Meduza-ն։

Իշխանությունների տվյալներով՝ մահացել է 85-ամյա մի կին։ Տուժածների մոտ ախտորոշվել են բեկորային վերքեր, գանգուղեղային տրավմատիկ վնասվածքներ և այրվածքներ։ Հաղորդվում է, որ Կուրսկում մի քանի տներում հրդեհներ են բռնկվել։ Զավոդսկայա փողոցի բազմաբնակարան շենքի ութերորդ և իններորդ հարկերը վնասվել են։ Օրլովսկայա փողոցի բազմաբնակարան շենքում հրդեհը տարածվել է հինգ հարկերում, իսկ Վեսպրեմսկայա փողոցի շենքում՝ մեկ հարկում։

Տեղի իշխանությունները պնդում են, որ Օրլովսկայա փողոցում անօդաչու թռչող սարքի անկման վայրում հայտնաբերվել են խոցող տարրեր՝ պողպատե գնդիկներ։ Բնակիչները տեղավորվել են ժամանակավոր բնակության վայրերում։ Նշվում է, որ ԱԹՍ-ների հարվածի տակ է հայտնվել շտապօգնության մեքենաների ավտոկայանատեղին, վնասվել է 11 մեքենա, 3 մասնավոր տուն։

ՌԴ ՊՆ-ն էլ հայտնել է, որ լույս ապրիլի 15-ի գիշերը ՀՕՊ ուժերը որսացել և ոչնչացրել են ուկրաինական 115 անօդաչու թռչող սարք, որից 109-ը՝ Կուրսկի մարզում։ Ուկրաինական կողմը  դեռևս չի մեկնաբանել այս տեղեկությունները։

Հիշեցնենք, որ ապրիլի 13-ի առավոտյան ռուսական զորքերը բալիստիկ հրթիռներով հարձակում էին իրականացրել Սումի քաղաքի վրա։ Զոհվել էր առնվազն 34 մարդ, այդ թվում՝ 2 երեխա։

Թարգմանությունը՝ Էմմա Չոբանյանի