13.01.2026 | 12:34
Ադրբեջանի և Հայաստանի միջև խաղաղության համաձայնագրի նախաստորագրումը պատմական իրադարձություն է. Իտալիայի ԱԳՆ
Սի Ցզինպինը հայտարարել է, որ «առևտրային և մաքսատուրքային պատերազմներում հաղթողներ չեն լինում»
Քաղաքականություն
14.04.2025 | 15:35
Չինաստանի առաջնորդ Սի Ցզինպինը զգուշացրել է՝ պրոտեկցիոնիզմը «ոչ մի տեղ չի տանում», առևտրային պատերազմը «հաղթողներ չի ունենում», գրում է France 24-ը:
Սի Ցզինպինը Հարավարևելյան Ասիա է մեկնում՝ այս տարվա առաջին արտասահմանյան ուղևորությունը, որը ներառում է այցելություններ Վիետնամ, Մալայզիա և Կամբոջա, քանի որ Պեկինը ձգտում է ամրապնդել տարածաշրջանային առևտրային կապերը և փոխհատուցել ԱՄՆ նախագահ Դոնալդ Թրամփի կողմից սահմանված հսկայական մաքսատուրքերի ազդեցությունը։
Վիետնամի խոշորագույն «Նհան Դան» պարբերականում հրապարակված հոդվածում Սին կոչ է արել երկու երկրներին «վճռականորեն պաշտպանել բազմակողմ առևտրային համակարգը, կայուն գլոբալ արդյունաբերական և մատակարարման շղթաները, ինչպես նաև բաց և համագործակցային միջազգային միջավայրը»։
Նա նաև վերահաստատել է Պեկինի դիրքորոշումը, որ «առևտրային և մաքսատուրքային պատերազմներում հաղթողներ չեն լինում, իսկ պրոտեկցիոնիզմը ոչնչի չի հանգեցնի»։
Լրատվամիջոցն ընդգծում է, որ Պեկինը փորձում է իրեն ներկայացնել որպես անկանխատեսելի Թրամփի կայուն այլընտրանք, որն այս ամիս հայտարարել, ապա մեծ մասամբ չեղյալ է հայտարարել խիստ մաքսատուրքերը, որոնք ցնցել են համաշխարհային շուկաները։
Վիետնամը Հարավարևելյան Ասիայում չինական ապրանքների ամենամեծ գնորդն է՝ 161,9 միլիարդ դոլար ծավալով, որին հաջորդում է Մալայզիան, որը 2024 թվականին 101,5 միլիարդ դոլարի ներմուծում է իրականացրել։ Հարավարևելյան Ասիայի հարևանների հետ ավելի ամուր կապերը կարող են նաև օգնել չեզոքացնել մեկուսացված Միացյալ Նահանգների ազդեցությունը, որն անցյալ տարի չինական ապրանքների ամենամեծ ներմուծողն էր։
Թարգմանությունը՝ Էմմա Չոբանյանի
