Թուրքիան ՀՀ-ին վերահաստատել է իր վճռականությունը՝ Կովկասում խաղաղությունն ու կայունությունն ամրապնդելու գործընթացը շարունակել կառուցողական հիմունքներով

Թուրքիայի և Հայաստանի միջև դիվանագիտական ​​հարաբերություններում գրանցվել է ևս մեկ նշանակալի զարգացում, գրում է թուրքական իշխանամերձ Turkiye gazetesi պարբերականը։

Նշվում է, որ Թուրքիայի և Հայաստանի միջև դիվանագիտական ​​կապերը շարունակում են զարգանալ։ Երկրի արտաքին գործերի փոխնախարար Այշե Բերիս Էքինջին կարևոր հանդիպում է ունեցել Հայաստանի արտաքին գործերի փոխնախարար Վահան Կոստանյանի հետ։

«Մենք կարևոր հանդիպում ունեցանք փոխնախարար Էքինջիի հետ՝ Հայաստանի և Թուրքիայի միջև հարաբերությունների կարգավորման գործընթացն առաջ մղելու և համագործակցության հնարավոր նոր ոլորտները բացահայտելու համար»,- գրել է Կոստանյանը X հարթակում արված հայտարարության մեջ։

Ըստ թուրքական լրատվամիջոցի՝ հանդիպման ընթացքում կողմերը քննարկել են ոչ միայն դիվանագիտական ​​հարաբերությունների կարգավորմանը, այլև կոնկրետ համագործակցությանը վերաբերող հարցեր, ինչպիսիք են տնտեսությունը, տրանսպորտը և սահմանների կառավարումը։ Աղբյուրների համաձայն՝ Թուրքիան վերահաստատել է իր վճռականությունը Կովկասում խաղաղությունն ու կայունությունն ամրապնդելու գործընթացը կառուցողական հիմունքներով շարունակելու հարցում։

Նշվում է, թե «Անկարայի կողմից երկար ժամանակ իրականացվող կարգավորման գործընթացը հասել է այնպիսի չափման, որը ազդում է ոչ միայն Հայաստանի, այլև ամբողջ Հարավային Կովկասի ուժերի հավասարակշռության վրա։ Թուրքիայի կողմից իր արտաքին քաղաքականության տեսլականի շրջանակում ձեռնարկված քայլերն արագացնում են տարածաշրջանում դիվանագիտական ​​նախաձեռնությունները։

Թարգմանությունը՝ Էմմա Չոբանյանի