Հաղորդաշարեր
12.04.2025 | 19:00«Մենք ապրում ենք ժողովրդավարական երկրում, և եթե ՔՊ-ն Գյումրիի ավագանու ընտրություններում ուզում էր հաղթել, պետք է ավելի լավ կառավարեր, կնշանակի` ինչ-որ բան թերի է արել: Իսկ եթե ընտրվել է մի ուժ, որը լավ համբավ չունի, դա նաև նշանակում է, որ հանրությունը խնդիր ունի: Պարզապես չկա այնպիսի ուժ, որը կբերի իրական փոփոխություններ, ով էլ գա` դառնալու է այս համակարգի մի մաս»,- Factor TV-ի հետ զրույցում տեսակետ է հայտնում երգիչ, երգահան Վահագ Ռաշը, որը, ի դեպ, ծնունդով Շիրակից է:
Նրա խոսքով՝ ներկայիս իշխանությունը նախկինների շարունակությունն է. ժամանակի ընթացքում փոխվում են դեմքեր, իսկ համակարգը նույնն է: Վահագ Ռաշը նշում է`հետընտրական Գյումրիում, այնուամենայնիվ, կհաջողվի հաշտության մթնոլորտ ձևավորել, քանի որ գյումրեցին ձգտում է իր քաղաքի վիճակը բարելավել, լավացնել, և ընտրություններն այդ նպատակն ունեն:
Վահագը խոսում է նաև մշակութային խնդիրներից, մեր երգարվեստի ներկայիս վիճակից. «Այսօր որակյալ գործեր քիչ են ստեղծվում, մեծ մասը վազում է կոմերցիայի հետևից: Երգիչներ կան` չեն ամաչում, մուղամն Ամերիկայում հայկական երաժշտություն են ներկայացնում: Պետք է զրկել համերգներից նրանց, ովքեր ադրբեջանական երգերը հայերեն են մատուցում, ամոթ է»:
Վահագը նկատում է` մոլախոտն ամբողջ աշխարհում է կերել ամեն լավ բան. «Վերջին 25 տարում հատուկենտ են մնայուն երգեր ստեղծվել: Նվնվացող, տնքացող աղջիկներ են հայտնվել երգարվեստում, մերոնց մեջ էլ կան… այդ ռիթմերը երկար կյանք չունեն»:
Մանրամասները`տեսանյութում:
Աննա Բաբաջանյան
