Քասախցիների պահանջը կդիտարկենք, բայց պետք է երթուղիներն իրար չխանգարեն. փոխնախարար․ ՏԵՍԱՆՅՈՒԹ

Կոտայքի մարզի Քասախ համայնքի բնակիչների հետ փակ հանդիպումից հետո ՏԿԵ փոխնախարար Արմեն Սիմոյանյանը լրագրողների հետ ճեպազրույցում հայտարարեց, որ համայնքի բնակիչների պահանջը կդիտարկեն, բայց պետք է երթուղիներն իրար չխանգարեն։

«Այս հարցը պետք է քննարկենք Երևանի քաղաքապետարանի հետ, որովհետև 59 համարի երթուղին Երևանի քաղաքապետարանի ենթակայության տակ է գտնվում։ Քասախի բնակիչները պահանջում են, որ 59 համարի ավտուբուսը մտնի բնակավայր, որպես կոմպրոմիսային առաջարկ այդ տարբերակը քննարկեցինք, որ 59 համարը ճանապարհից մոտ 150 մետր շեղվի և մտնի գյուղ՝ հասնելով  մինչև փոստի շենք։ Այդ տարբերակը մենք կդիտարկենք, եթե այն  ընդունելի լինի քաղաքապետարանի համար։ Ժամանակ խնդեցինք, որպեսզի լուծում գտնենք։ Հարցը պետք է քննարկենք նաև «Մուլտի տրանսպորտի» հետ։ Պետք է բոլորը գոհ լինեն և՛ քաղաքացիները, և՛ փոխադրողները»,- նշեց փոխնախարարը։

Նշենք, որ Կոտայքի մարզի Քասախ համայնքի բնակիչները վաղ առավոտից փակել էին Երևան-Աշտարակ ճանապարհը։  Նրանք պահանջում են, որ որպեսզի չհանվի ավտոբուսային համար 59 երթուղին։

Հիշեցնենք, որ երեկ Պռոշյան և Քասախ համայնքի բնակիչները կառավարությունում հանդիպել էին պատկան մարմինների ներկայացուցիչների հետ։ Հանդիպման արդյունքում Պռոշյանի տրանսպորտի հարցը մասամբ լուծվել է՝ համար 25 երթուղին շրջադարձ կանի ՊՆ նախկին շենքի մոտից, իսկ Քասախը սպասարկող համար 59 երթուղին հանվում է։  Ապրիլի 5-ից Պռոշյանի և Քասախի բնակիչները պարբերաբար փակում են Երևան-Աշտարակ ճանապարհը՝ պահանջելով լուծել տրանսպորտի հարցը։ Բնակիչները հայտնում են, որ Պռոշյան և Քասախ բնակավայրերը մայրաքաղաքին կապող երևանյան 25 և 59 համարի ավտոբուսները շուտով պետք է փոխարինվեն Գագիկ Ծառուկյանի ընտանիքին պատկանող «Մուլտի տրանսպորտի»  ընկերության  միկրոավտոբուսներով, որոնց ուղեվճարն ավելի բարձր է՝ 200 դրամ։

Մանրամասները՝ տեսանյութում։