Որ ավտոբուսը հանում էիք, չէիք մտածո՞ւմ, որ էս վիճակն է լինելու. քասախցին` պաշտոնյային. ՏԵՍԱՆՅՈՒԹ

Քասախ համայնքի բնակիչները միակողմանի բացեցին Երևան- Աշտարակ ճանապարհը, որպեսզի պատկան կառույցի ղեկավարներն այցելեն համայնք՝ իրենց հետ քննարկելու տրանսպորտի հարցը։ Բողոքի ակցիայի վայր ժամանեց ՏԿԵ տրանսպորտի վարչության բաժնի պետ Պապին Գալստյանը։ Նա առաջարկեց խումբ ձևավորել, գնալ Եղվարդ համայնք և այնտեղ քննարկել տրանսպորտի հարցը։ Քասախի բնակիչները, սակայն, մերժեցին պաշտոնյայի առաջարկը և պահանջեցին, որ իրենց հետ հանդիպման գա Կոտայքի մարզպետը։ Այնուհետև բողոքի ակցիայի մասնակիցները կառավարության ներկայացուցչին ներկայացրեցին իրենց դժգոհությունները։

«Որ ավտոբուսը հանում էիք, չէիք մտածո՞ւմ, որ էս վիճակն է լինելու։ Չեք մտածո՞ւմ, որ մարդիկ ընդվզելու են։ Մենք 30 տարի քաղաքային տրանսպորտից ենք օգտվել, իսկ հիմա դա հանում եք և ավելի թանկ տրանսպորտ եք բերում»,- ասաց բողոքի ակցիայի մասնակիցներից մեկը։

Նշենք, որ վաղ առավոտյան Քասախ համայնքի բնակիչները փակել էին Երևան- Աշտարակ ճանապարհը՝ պահանջելով, որ ավտոբուսային համար 59 երթուղին չհանվի։ Բնակիչները ճանապարհը բացեցին միայն պաշտոնյանների գյուղ այցից հետո։

Հիշեցնենք, որ երեկ Պռոշյան և Քասախ համայնքի բնակիչները կառավարությունում հանդիպել էին պատկան մարմինների ներկայացուցիչների հետ։ Հանդիպման արդյունքում Պռոշյանի տրանսպորտի հարցը մասամբ լուծվել է՝ համար 25 երթուղին շրջադարձ կանի ՊՆ նախկին շենքի մոտից, իսկ Քասախը սպասարկող համար 59 երթուղին հանվում է։ Ապրիլի 5-ից Պռոշյանի և Քասախի բնակիչները պարբերաբար փակում են Երևան-Աշտարակ ճանապարհը՝ պահանջելով լուծել տրանսպորտի հարցը։

Մանրամասները՝ տեսանյութում։