05.07.2026 | 01:14
«Ուիմբլդոն». Կարեն Խաչանովը դուրս է մնացել պայքարից
Արշակ Օրդուխանյանը ինքնաբացարկ է հայտնել ու Վիլեն Գաբրիելյանի վայր դրած մանդատը վերցրել է Արտյոմ Մեհրաբյանը
Քաղաքականություն
09.04.2025 | 17:36
Կենտրոնական ընտրական հանձնաժողովն ապրիլի 8-ին ստացել է Ազգային Ժողովի պատգամավոր Վիլեն Գաբրիելյանի՝ պատգամավորի լիազորությունները դադարած համարելու մասին ԱԺ նախագահի արձանագրությունը․ տեղեկացնում են ԿԸՀ-ից։
«Հանձնաժողովն ապրիլի 9-ի արտահերթ նիստում արձանագրել է, որ ԱԺ «Քաղաքացիական պայմանագիր» կուսակցության ընտրական ցուցակից ընտրված և լիազորությունները վաղաժամկետ դադարած պատգամավորի մանդատը տրամադրվել է կուսակցության ընտրական ցուցակի առաջին մասին հերթական հաջորդ թեկնածու Արտյոմ Ղուկասի Մեհրաբյանին։
Մինչ այդ հանձնաժողովը ուժը կորցրած է ճանաչել «Քաղաքացիական պայմանագիր» կուսակցության ընտրական ցուցակում ընդգրկված պատգամավորի թեկնածու Արշակ Գեւորգի Օրդուխանյանի գրանցումը՝ հիմքում ընդունելով ԿԸՀ ներկայացված ինքնաբացարկի և մանդատից հրաժարվելու մասին 2025 թվականի ապրիլի 2-ի դիմումը, որը վավերացված է եղել նոտարական կարգով»,- ասված է ԿԸՀ-ի տարածած հաղորդագրությունում։
Արտյոմ Մեհրաբյանը, հիշեցնենք, «Ժողովրդավարական հայրենիք» կուսակցության փոխնախագահ, վաղամեռիկ Ղուկաս Մեհրաբյանի որդին է։
Արտյոմ Մեհրաբյանը եղել է Չարենցավանի հաստոցաշինական գործարանի տնօրեն, ապա 2019 թվականի փետրվարին նշանակվել է Աջափնյակ վարչական շրջանի աշխատակազմի ղեկավար։ Իսկ 2022 թ․ մայիսին ՀՀ վարչապետ Նիկոլ Փաշինյանի որոշմամբ նշանակվել է ռազմարդյունաբերության կոմիտեի նախագահ ու զբաղեցրած պաշտոնից ազատվել է 2024 թ․ հուլիսին։
