ՌԴ-ն հայտնել է Օրենբուրգի ռազմական օդանավակայանի վրա հարձակման մասին

ՌԴ Պաշտպանության նախարարությունը հայտարարել է, որ ապրիլի լույս 9-ի գիշերը ռուսական շրջանների վրա ոչնչացվել և որսացել է ավելի քան 160 ուկրաինական անօդաչու թռչող սարք, գրում է Meduza-ն։

Գերատեսչությունը նախ հաղորդել է 158 անօդաչու թռչող սարքերի հարձակման մասին, որոնցից 67-ը որսացել են Կրասնոդարի երկրամասում, ևս 29-ը՝ Ռոստովի մարզում։ Ավելի ուշ ՊՆ-ն հայտնել է նաև, որ չորս անօդաչու թռչող սարք է խոցել Օրենբուրգի շրջանի, երկուսը՝ Նիժնի Նովգորոդի շրջանի վրա։ Բացի այդ, անօդաչու սարքերը հարձակվել են Վորոնեժի, Կուրսկի, Բելգորոդի, Պենզայի, Սարատովի և Օրյոլի շրջանների, Ստավրոպոլի երկրամասի, Հյուսիսային Օսիայի և Ղրիմի վրա։

Ռոստովի մարզի Ակսայ քաղաքում անօդաչու թռչող սարքի հարձակման պատճառով տարհանվել են Պլատովի փողոցի 74 շենքի բոլոր 48 բնակարանների բնակիչները։ Զոհեր և ավերածություններ չկան։

Օրենբուրգի մարզում էլ հակաօդային պաշտպանության ուժերը հետ են մղել անօդաչու թռչող սարքի հարձակումը ռազմական օդանավակայանի վրա, հայտնել է շրջանի նահանգապետի պաշտոնակատար Եվգենի Սոլնցևը։

Հյուսիսային Օսիայում ուկրաինական 15 անօդաչու թռչող սարք է խոցվել Մոզդոկի շրջանում, հայտարարել է հանրապետության ղեկավար Սերգեյ Մենյայլոն։ Տելեգրամ ալիքները պնդում են, որ Մոզդոկում հարձակման թիրախը եղել է ռազմական օդանավակայանը։

Լրատվամիջոցը նշում է, որ երեկոյից թռիչքների անվտանգությունն ապահովելու նպատակով Վլադիկավկազի, Վոլգոգրադի և Գրոզնիի օդանավակայաններում օդանավերի ժամանման և մեկնման սահմանափակումներ են մտցվել։ Մոսկվայի ժամանակով առավոտյան ժամը 7-ին սահմանափակումները հանվել են։

Թարգմանությունը՝ Էմմա Չոբանյանի