Քաղաքականություն
09.04.2025 | 11:25
Եթե Հայաստանի և Ադրբեջանի միջև խաղաղության համաձայնագիր ստորագրվի, դա կարող է ազդարարել համագործակցության սկիզբը։ Այս մասին հայտարարել է Ադրբեջանի նախագահ Իլհամ Ալիևը Բաքվի ADA համալսարանում անցկացվող «Դեպի նոր աշխարհակարգ» թեմայով միջազգային ֆորումի ժամանակ, փոխանցում են ադրբեջանական լրատվամիջոցները։
«Կարծում եմ՝ մենք չպետք է ժամանակ կորցնենք։ Երբ խոսքը խաղաղության համաձայնագրի մասին է, գնդակը Հայաստանի դաշտում է, ես այս մասին բազմիցս ասել եմ։ Հայտնի է, թե ինչ ենք ակնկալում Հայաստանից մեր տարածքային ամբողջականության և իրենց Սահմանադրության հարցում։ Եթե դա արվի, ապա կարող է կնքվել խաղաղության պայմանագիր, և Հարավային Կովկասում արդեն ինտեգրված տարածաշրջանի համար որևէ խոչընդոտ չի մնա»,- նշել է նա։
Ալիևը նաև նշել է, թե Ադրբեջանը պատրաստ է Հայաստանի հետ վստահության ամրապնդման քայլեր սկսել։
«Մենք չենք պատկերացնում, թե ինչպես անմիջապես բարեկամներ կդառնանք Հայաստանի հետ, դա անիրատեսական է: Նույնիսկ տնտեսական որևէ ինտեգրացիայի մասին խոսելը վաղաժամ է: Բայց մենք պատրաստ ենք փոքր քայլեր ձեռնարկել վստահության ամրապնդման ուղղությամբ»,- նշել է Ադրբեջանի նախագահը։
Նա նաև ասել է, թե Հայաստանը կարող էր տարանցիկ երկիր դառնալ Ադրբեջանի էներգետիկ ռեսուրսների և տրանսպորտային ուղիների համար։
«Ադրբեջանից նավթի, գազի կամ այլ բեռների փոխադրումն անցնում է Վրաստանի տարածքով, Հայաստանը կարող էր լինել այդ գործընթացի մի մասը։ Դա իրենց սխալն է։ Նրանք սխալ են հաշվարկել իրենց ապագա զարգացումը և զրկել են իրենց տնտեսական ապագայից։ Արդյունքում նրանց իրական անկախությունը խոչընդոտվել է։ Նրանք ապրել են «մեծ Հայաստանի» երազանքով»,- ասել է Ալիևը։
Հայաստանի հասցեին հերթական կեղծ մեղադրանքները հնչեցնելով՝ Ալիևը հայտարարել է, թե, իբր, «Հայաստանի գործողությունները հնարավորություններ չեն ստեղծել Հարավային Կովկասի տարածաշրջանի զարգացման համար»։ Նա նաև կրկին դժգոհել է Հայաստանի սպառազինումից։
«Հայաստանի նոր ընկերները նրան նոր մահաբեր զենք են տրամադրում։ Դա ամենևին չի ծառայում տարածաշրջանում խաղաղությանն ու կայունությանը, դա միայն կծառայի լարվածության նոր օջախներ ստեղծելուն»,- ասել է Ադրբեջանի ղեկավարը՝ հայտարարելով, թե այսօր Հայաստանում ռևանշիստական խմբեր կան։
Ըստ Ալիևի՝ «Հարավային Կովկասում բաժանարար գծեր ստեղծելու՝ երրորդ կողմերի փորձերը հաջողություն չեն ունենա»։
Թարգմանությունը՝ Էմմա Չոբանյանի
