Իրանի հետ համաձայնագիրը չի նախատեսում ռազմական դաշինքի ստեղծում և միմյանց ռազմական օգնության տրամադրում․ ՌԴ ԱԳՆ

Իրանի հետ ռազմավարական գործընկերության համաձայնագիրը ռազմական դաշինք չէ երկու երկրների միջև, երեքշաբթի ասել է Ռուսաստանի փոխարտգործնախարար Անդրեյ Ռուդենկոն, գրում է Ինտերֆաքսը։

«Ցանկանում եմ ընդգծել, որ համաձայնագրի կնքումը չի նշանակում Իրանի հետ ռազմական դաշինքի ստեղծում և չի նախատեսում միմյանց ռազմական օգնություն տրամադրում»,- ասել է նա՝ ելույթ ունենալով Պետդումայում՝ Իրանի հետ ռազմավարական գործընկերության մասին համաձայնագրի վավերացման ժամանակ։

Միևնույն ժամանակ, Ռուդենկոն հիշեցրել է «Ռուսաստանի կամ Իրանի վրա հարձակման դեպքում ագրեսորին ռազմական կամ այլ օգնություն չտրամադրելու մասին», ինչպես նաև «ՄԱԿ-ի կանոնադրության և միջազգային իրավունքի այլ նորմերի հիման վրա առաջացող տարաձայնությունների լուծմանն աջակցելու մասին» հոդվածները:

«Պայմանագիրը կոչված է կայունացնող դեր խաղալ Մերձավոր Արևելքում, կնպաստի Ռուսաստանին և Իրանին հարևանությամբ գտնվող Մերձկասպյան, Անդրկովկասյան և Միջինասիական տարածաշրջանների անվտանգության պահպանմանը և դրական ներդրում կունենա եվրասիական անվտանգության նոր ճարտարապետության կառուցման գործում»,- նշել է Ռուդենկոն։

Հավելենք, որ ՌԴ Պետդուման այսօր վավերացրել է Ռուսաստանի Դաշնության և Իրանի Իսլամական Հանրապետության միջև Համապարփակ ռազմավարական գործընկերության մասին պայմանագիրը։

Համաձայնագիրը ստորագրվել էր այս տարվա  հունվարին՝ Իրանի նախագահ Մասուդ Փեզեշքիանի՝ Մոսկվա կատարած այցի ընթացքում։

Թարգմանությունը՝ Էմմա Չոբանյանի