Քաղաքականություն
08.04.2025 | 12:32
Ուկրաինայի նախագահ Վլադիմիր Զելենսկին ավանդական երեկոյան ուղերձում հայտարարել է ՌԴ Բելգորոդի մարզում ուկրաինացի զինվորականների ներկայության մասին, գրում է BBC-ի ռուսական ծառայությունը։
«Գլխավոր հրամանատար Ալեքսանդր Սիրսկին այսօր առանձին զեկուցել է՝ ճակատը, մեր ներկայությունը Կուրսկի շրջանում և մեր ներկայությունը Բելգորոդի շրջանում: Մենք շարունակում ենք ակտիվ գործողություններ վարել թշնամու տարածքի սահմանամերձ շրջաններում, և դա բացարձակապես արդար է. պատերազմը պետք է վերադառնա այնտեղ, որտեղից եկել է», – հայտարարել է Զելենսկին։
Սա ամենաբարձր մակարդակով առաջին հրապարակային հաստատումն է Բելգորոդի մարզում ուկրաինական ստորաբաժանումների առկայության մասին։
Ուկրաինայի նախագահի խոսքով՝ այդ գործողությունների նպատակը հարևան Սումիի և Խարկովի շրջանների ուկրաինական բնակավայրերի պաշտպանությունն է, որոնք պարբերաբար ենթարկվում են գնդակոծությունների։
Մարտի 18-ին ՌԴ ՊՆ-ն հայտնել էր, որ Ուկրաինայի զինված ուժերի «ստորաբաժանումները Ռուսաստանի տարածք Բելգորոդի շրջանի արևմտյան մասում՝ Դեմիդովկա և Պրիլեսյե բնակավայրերի ուղղությամբ ներխուժման փորձ են արել»:
Նույն օրը լրագրողները Զելենսկիին հարցրել էին՝ արդյո՞ք Ուկրաինան գործողություններ է իրականացնում Բելգորոդի շրջանում։
«Այնտեղ օպերացիա կա. ինչ-որ մեկին թվում է, թե ինչ-որ մեկը վազել է, գնացել է ինչ-որ այլ անկյուն: Դրանք մեր միանգամայն հասկանալի ռազմավարական քայլերն են, քանի դեռ թշնամին մեր տարածքում է»,- պատասխանել էր Ուկրաինայի նախագահը։
Թարգմանությունը՝ Էմմա Չոբանյանի
