04.04.2026 | 20:03
ՃՏՊ՝ հրդեհի բռնկմամբ
Նեթանյահուն ժամանել է Վաշինգտոն՝ Թրամփի հետ բանակցելու մաքսատուրքերի հարցով
Քաղաքականություն
07.04.2025 | 14:19
Իսրայելի վարչապետ Բենիամին Նեթանյահուն ժամանել է Վաշինգտոն՝ ԱՄՆ նախագահ Դոնալդ Թրամփի և բարձրաստիճան պաշտոնյաների հետ առաջիկա երկու օրերի ընթացքում հապճեպ բանակցությունների, գրում է The Times of Israel-ը։
Հանդիպումների ընթացքում հիմնականում քննարկվելու են Գազայում շարունակվող պատերազմի և պատանդների հարցերը, որոնցից 59-ը դեռևս գերության մեջ են, ինչպես նաև Թրամփի նոր մաքսային քաղաքականությանը, որի արդյունքում իսրայելական ապրանքների համար 17 տոկոս մաքսատուրք է սահմանվել։
Նեթանյահուի գրասենյակից հայտնել են նաև, որ օրակարգում կլինեն «Իսրայել-Թուրքիա հարաբերությունները, Իրանի սպառնալիքը և Միջազգային քրեական դատարանի դեմ հակազդեցությունը»: Նշվում է, որ Նեթանյահուն Բուդապեշտից է Վաշինգտոն ուղևորվել՝ այցի մասին հայտարարությունից 24 ժամ չանցած:
Կնոջ՝ Սառա Նեթանյահուի հետ Վաշինգտոն ժամանելուն պես Նեթանյահուն ավտոշարասյունով օդանավակայանից շարժվել է դեպի Բլեր Հաուս, որտեղ հանդիպել է ԱՄՆ առևտրի նախարար Հովարդ Լութնիկին և առևտրի ներկայացուցիչ Ջեյմսոն Գրիրին: Նեթանյահուի գրասենյակից հաղորդել են, որ հանդիպումը «ջերմ և արդյունավետ» է եղել։
Ի դեպ, Իսրայելի վարչապետի ինքնաթիռը թռել է մի երթուղով, որը Բուդապեշտից Վաշինգտոն ճանապարհն ավելացրել է մոտ 400 կիլոմետրով՝ խուսափելու այն երկրներով թռչելուց, որոնք, ենթադրաբար, կկատարեին Միջազգային քրեական դատարանի ձերբակալման հրամանը, եթե ինքնաթիռը ստիպված լիներ այնտեղ արտակարգ վայրէջք կատարել: Քանի որ Իսրայելը կարծում է, որ Իռլանդիան, Իսլանդիան և Նիդերլանդները կկատարեն ՄՔԴ հրամանը, ինքնաթիռը թռել է Խորվաթիայի, Իտալիայի և Ֆրանսիայի վրայով:
Թարգմանությունը՝ Էմմա Չոբանյանի
