30.08.2026 | 23:44
Վաղարշապատում կինը դանակահարել է 43-ամյա տղամարդուն․ նա մահացել է. ՆԳՆ
Բաքուն անընդունելի է համարել Փարիզի՝ ՀՀ-ի հետ խաղաղության պայմանագրի շուրջ Ադրբեջանի պահանջների մասին հայտարարությունները
Քաղաքականություն
03.04.2025 | 21:09
«Մենք կտրականապես մերժում ենք 2025 թվականի ապրիլի 2-ին Ֆրանսիայի Եվրոպայի և արտաքին գործերի նախարար Ժան-Նոել Բարոյի՝ Ֆրանսիայի Ազգային ժողովի արտաքին հարաբերությունների հանձնաժողովում ելույթի ժամանակ Ադրբեջանի և Հայաստանի միջև խաղաղության գործընթացի և ծագումով հայ անձանց դատավարության վերաբերյալ հնչեցրած մեղադրանքները»։ Այս մասին հայտարարել է Ադրբեջանի ԱԳՆ մամուլի խոսնակ Այխան Հաջիզադեն։
Նա նշել է, թե, իբր, «անընդունելի է կասկածի տակ դնել Ադրբեջանի նկատմամբ տարածքային պահանջներ պահպանող Հայաստանի Սահմանադրությունը փոփոխելու «օրինական» պահանջը, որը քննարկվում է ավելի քան երկու տարի, և դա որպես նոր պայման ներկայացնել»։
«Եթե Ֆրանսիան իսկապես աջակցում է խաղաղության համաձայնագրի շուտափույթ ստորագրմանը, ինչպես ինքն է պնդում, ապա պետք է կոչ անի Հայաստանին ձեռնարկել համապատասխան քայլեր։ Ֆրանսիան, որը փորձում է միջամտել այլ երկրների դատական գործընթացներին, ավելի լավ կանի՝ նախ հետաքննի իր երկրում քաղաքական հետապնդումների դեպքերը, տարբեր միջոցառումների ժամանակ ցուցարարների սպանությունները, նեոգաղութատիրական քաղաքականության հետևանքով անդրծովյան տարածքներում տեղի բնակչության խոշտանգումների դեպքերը, ինչպես նաև կաշառակերության և կոռուպցիայի տարածվածությունը Ֆրանսիայի խորհրդարանում»,- հայտարարել է Հաջիզադեն։
Նա նշել է, որ «Բաքուն Ֆրանսիայից պահանջում է դադարեցնել խաղաղությանը չնպաստող քայլերը և հրաժարվել տարածաշրջանում իրավիճակն ապակայունացնող գործողություններից»։
Թարգմանությունը՝ Էմմա Չոբանյանի
