25.05.2026 | 00:01
Մայիսի 25-ի վաղ առավոտյան ՀՀ ԶՈւ ավիացիան Երևանի կենտրոնում կատարելու է թռիչք․ ՊՆ
Խաչատրյանի անվան մրցույթին մասնակցելու հայտ է ներկայացրել 42 երկրի շուրջ 200 դիրիժոր
Մշակույթ
03.04.2025 | 10:39
Խաչատրյանի անվան միջազգային մրցույթին այս տարի մասնակցության հայտ է ներկայացրել շուրջ 200 դիրիժոր․ տեղեկացնում են «Արամ Խաչատրյան» մշակութայն հիմնադրամից։
«Հիշեցնենք, որ ամեն տարի հայ մեծ կոմպոզիտոր Արամ Խաչատրյանի ծննդյան օրը՝ հունիսի 6-ին, մեկնարկում է խաչատրյանական մրցույթը։ Այս տարի այն անցկացվելու է «դիրիժորություն» մասնագիտական կարգում։ Մրցույթի առաքելությունն է բացահայտել տաղանդավոր երիտասարդ երաժիշտների, նրանց տալ առաջընթացի հնարավորություն և աշխարհում հանրայնացնել Խաչատրյանի երաժշտական ժառանգությունը։
Այս տարի մասնակցության համար դիմած դիրիժորները ներկայացնում են աշխարհի 42 երկրներ՝ Չինաստան, Հարավային Կորեա, Ռուսաստան, Ճապոնիա, ԱՄՆ, Անգլիա, Գերմանիա, Իտալիա, Ֆրանսիա, Կանադա, Վենեսուելա, Հունաստան, Իսրայել, Սինգապուր, Ավստրալիա, Ուկրաինա, Հայաստան և այլն։
Հետաքրքիր է նաև դիմորդների սեռային համամասնությունը. նրանց շուրջ 70 տոկոսը արական սեռի ներկայացուցիչներ են, մոտ 30 տոկոսը՝ իգական։
Նախընտրական փուլի ժյուրին արդեն իսկ իրականացնում է նախնական լսումները, որոնց միջոցով ապրիլի 5-ին կհայտարարվեն 18-20 դիրիժորների անունները, որոնք հնարավորություն կունենան պայքարելու մրցույթի մրցանակային տեղերի համար։
Խաչատրյանի անվան միջազգային մրցույթն անցկացվում է «Արամ Խաչատրյան» մշակութայն հիմնադրամի կողմից՝ ՀՀ ԿԳՄՍ նախարարության աջակցությամբ։ Երաժշտական այս ստուգատեսն անդամակցում է Միջազգային երաժշտական մրցույթների համաշխարհային ֆեդերացիային (WFIMC) և նախորդ երկու տասնամյակների ընթացքում իր արժանի տեղն է ամրագրել հեղինակավոր միջազգային երաժշտական մրցույթների շարքում»,- ասված է հաղորդագրությունում։
