24.06.2026 | 22:56
Կամավոր հանձնվել է մեծ քանակի զենք-զինամթերք
25 ժամ 5 րոպե․ ԱՄՆ սենատորի՝ Թրամփի դեմ ելույթը տևողության ռեկորդ է սահմանել
Քաղաքականություն
02.04.2025 | 16:48
Ամերիկացի դեմոկրատ սենատոր Քորի Բուքերը պատմական ակցիա է իրականացրել Սենատում՝ հանդես գալով ռեկորդային երկար ելույթով՝ զգուշացնելով ԱՄՆ նախագահ Դոնալդ Թրամփի քաղաքականությունից բխող վտանգների մասին, գրում է DW-ի ռուսական ծառայությունը։
Նյու Ջերսիից սենատորը ելույթ է ունեցել 25 ժամ 5 րոպե, ինչը ռեկորդային է դարձել ԱՄՆ Կոնգրեսի վերին պալատի ժամանակակից պատմության մեջ։ Այս մասին հայտնել է CNN-ը՝ հղում անելով Բուքերի գրասենյակին։ Այսպիսով, 55-ամյա քաղաքական գործիչը գերազանցել է 1957 թվականին սենատոր Սթրոմ Թերմոնդի սահմանած ռեկորդը, որը 24 ժամ 18 րոպե խոսել էր Քաղաքացիական իրավունքների մասին օրենքի դեմ:
Բուքերն իր ելույթը սկսել է ԱՄՆ արևելյան ափի ժամանակով մարտի 31-ի երեկոյան 7-ին և ավարտել ապրիլի 1-ի երեկոյան։
«Ընդամենը 71 օրվա ընթացքում Միացյալ Նահանգների նախագահն այնքան մեծ վնաս հասցրեց ամերիկացիների անվտանգությանը, ֆինանսական կայունությանը, մեր ժողովրդավարության հիմքերին։ Ամերիկայում սովորական ժամանակներ չեն: Եվ որպես այդպիսին՝ չպետք է դիտարկվեն Միացյալ Նահանգների Սենատում»,- իր ելույթում ասել է սենատորը։
Բուքերը որևէ ընդմիջում չի արել։ Միակ բացառությունը կարճ աղոթքն է եղել և դեմոկրատների հարցերին պատասխանները։
Քորի Բուքերը սենատոր է 2013 թվականից: Նա առաջին աֆրոամերիկացին է, որը ներկայացնում է Նյու Ջերսին Սենատում և հինգ աֆրոամերիկացիներից մեկը 100 սենատորներից, որոնք ներկայում ԱՄՆ Կոնգրեսի վերին պալատում են։
Թարգմանությունը՝ Էմմա Չոբանյանի
