30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Տրվել է Սևանի ափին տեղադրված օդերևութաբանական գերժամանակակից կայանի աշխատանքների մեկնարկը․ մասնակցել է Գերմանիայի նախագահը
Տնտեսություն
02.04.2025 | 17:15
Գերմանիայի նախագահ Ֆրանկ-Վալտեր Շտայնմայերի և Շրջակա միջավայրի նախարար Հակոբ Սիմիդյանի կողմից հանդիսավոր կերպով տրվել է Սևանա լճի ափին տեղադրված օդերևութաբանական գերժամանակակից կայանի աշխատանքների մեկնարկը․ տեղեկացնում են գերատեսչությունից։
«Պաշտոնական այցով Հայաստանի Հանրապետությունում գտնվող Գերմանիայի նախագահ Ֆրանկ-Վալտեր Շտայնմայերին և տիկին Էլկե Բուդենբենդերին է ներկայացվել Գերմանիայի կառավարության և ԵՄ ֆինանսական աջակցությամբ իրականացվող EU4SEVAN ծրագրի շրջանակներում ձեռք բերված ավտոմատ օդերևութաբանական կայանի աշխատանքները և դրա կարևորությունը Սևանա լճի համար:
Սևանա լիճ թափվող գետերի վրա գործող «Հիդրոօդերևութաբանության և մոնիթորինգի կենտրոն» ՊՈԱԿ-ի հիդրոլոգիական դիտակետերում ջրի ելքերի (water discharge) չափման համար EU4Sevan ծրագրի կողմից ձեռք է բերվել գերմանական OTT ապրանքանիշի հինգ ջրաչափական պտուտան (current meter):
EU4Sevan Ծրագրի շրջանակներում ձեռք է բերվել նաև «Միկրոստեպ-Միս» ընկերության մեկ ավտոմատ օդերևութաբանական կայան, որը տեղադրվել է Սևանա լճի առափնյա գոտում։
Կայանի դերը կարևորվում է նրանով, որ այն գտնվում է անմիջապես առափնյա գոտում, որը հնարավորություն է տալիս ստանալ օդերևութաբանական տեղեկատվություն անմիջապես լճի առափնյա հատվածից։
Կայանում տեղադրված գոլորշացուցիչը հնարավորություն կտա հետագայում դիտարկումների տվյալների հիման վրա լրամշակել և ճշգրտել Սևանա լճի մակերևույթից գոլորշացման մեթոդիկան։
Կայանի բացման պաշտոնական արարողությունից հետո նախարարի տեղակալ Արամ Մեյմարյանը Գերմանիայի նախագահին է ներկայացրել Սևանա լիճը, դրա բացառիկ նշանակությունը և էկոհամակարգային կարևորությունը։
Նախարարի տեղակալը մանրամասն տեղեկություններ է տրամադրել նաև Սևանա լճի պահպանությանն ուղղված միջոցառումների վերաբերյալ: Հավելվել է, որ լճի ջրի մակարդակի պահպանման համար տարբեր ծրագրեր են իրականացվում, որոնք ներառում են ինչպես ջրի աղտոտման նվազեցման, այնպես էլ՝ ջրային ռեսուրսների կառավարման և պահպանման ուղղված գործողություններ:
Արամ Մեյմարյանն անդրադարձել է «ԵՄ-ն Սևանի համար» ծրագրի շրջանակում ձեռք բերված արդյունքներին՝ շեշտելով, որ ծրագրի իրագործումից շահում են նաև ափամերձ համայնքները։
Գերմանիայի նախագահն անձամբ մասնակցել է Սևանի ափամերձ հատվածից ջրի նմուշառման աշխատանքներին և ծանոթացավ սարքավորումներին։ Ջրի ֆիզիկաքիմիական ստուգումից հետո նա հետաքրքրվել է արդյունքներով։ ՊՈԱԿ-ի աշխատակիցները նրան հայտնել են, որ էլեկտրահաղորդականության, թթվայնության, ջերմաստիճանի, քլորոֆիլի, ընդհանուր լուծված աղերի հետ կապված տվյալները գտնվում են թույլատրելի նորմերի սահմաններում և իրենք բավարարված են արդյունքներից»,- ասված է հաղորդագրությունում։
