Քաղաքականություն
02.04.2025 | 12:43
ԱՄՆ Սենատի կեսը՝ 25 հանրապետականներ և 25 դեմոկրատներ, երեքշաբթի միավորվել են՝ պատժամիջոցներ սահմանելու համար, որոնք կկիրառվեն Ռուսաստանի դեմ, եթե Մոսկվան հրաժարվի Ուկրաինայի հետ բարեխիղճ խաղաղության բանակցություններից, գրում է Reuters-ը։
Օրինագծի գլխավոր աջակիցներ՝ հանրապետական սենատոր Լինդսի Գրեհեմը և դեմոկրատ սենատոր Ռիչարդ Բլումենտալն ասել են, որ դրանով առաջնային և երկրորդային պատժամիջոցներ կսահմանվեն Ռուսաստանի և այն կառույցների դեմ, որոնք աջակցում են Ուկրաինայում ռուսական ագրեսիային, եթե Մոսկվան չկարողանա բանակցություններ վարել կամ հետագա փորձեր ձեռնարկի՝ խաթարելու Ուկրաինայի ինքնիշխանությունը խաղաղության համաձայնագրից հետո:
Նշվում է, որ օրինագիծը երկկուսակցական համագործակցության հազվագյուտ օրինակ է պառակտված ԱՄՆ Կոնգրեսում։
«Ռուսաստանի դեմ պատժամիջոցները պահանջում են մաքսատուրքեր այն երկրների համար, որոնք գնում են ռուսական նավթ, գազ, ուրան և այլ ապրանքներ: ԱՄՆ Սենատում գերիշխող տեսակետն այն է, որ Ռուսաստանն է ագրեսորը, և որ այս սարսափելի պատերազմն ու Պուտինի ագրեսիային պետք է վերջ դրվի հիմա, իսկ ապագայում զսպվի»,- ասվում է սենատորների հայտարարության մեջ։
Ըստ օրինագծի կողմնակիցների՝ այն երկու պալատներում էլ կանցնի ճնշող մեծամասնությամբ, եթե Կոնգրեսի հանրապետական առաջնորդները թույլ տան քվեարկություն:
Դեռևս ոչինչ չի նշվում, թե երբ կարող է տեղի ունենալ քվեարկությունը։
Bloomberg-ը հաղորդում է, որ նախագիծը նախատեսում է 500% մաքսատուրք ռուսական նավթ, նավթամթերք, բնական գազ կամ ուրան գնող երկրներից ներմուծման համար։ Դա ենթադրում է նաև պատժամիջոցներ Ռուսաստանից ուրան գնող ցանկացած երկրի նկատմամբ։ Բացի այդ, սահմանափակումների փաթեթը կներառի ԱՄՆ ֆինանսական հաստատությունների՝ Ռուսաստանի կառավարության հետ կապված կազմակերպություններում ներդրումներ կատարելու արգելք, իսկ ԱՄՆ քաղաքացիներին կարգելվի ռուսական պետական պարտատոմսեր գնել:
Թարգմանությունը՝ Էմմա Չոբանյանի
