13.01.2026 | 10:31
Հրդեհ Այգեստան գյուղում․ տանը քաղաքացու դի է հայտնաբերվել
Իրանը բողոքի նոտա է հղել ԱՄՆ-ին
Քաղաքականություն
31.03.2025 | 17:26
Տարածաշրջանում աճող լարվածության պայմաններում Իրանը զգուշացրել է Միացյալ Նահանգներին զերծ մնալ թշնամական գործողություններից՝ պաշտոնական դիվանագիտական նոտա ուղարկելով Շվեյցարիայի դեսպանատան միջոցով, որը ներկայացնում է ԱՄՆ-ի շահերը Թեհրանում, գրում է Mehr գործակալությունը։
Նշվում է, որ տարածաշրջանն ապակայունացնելուն ուղղված իսրայելական շարունակական սադրանքների և ԱՄՆ նախագահի կողմից հնչեցված վերջին սպառնալիքների պատճառով Թեհրանում Շվեյցարիայի դեսպանատան ղեկավարի պաշտոնակատարը, որը ներկայացնում է Իրանում ԱՄՆ-ի շահերը, երկուշաբթի առավոտյան Իրանի ԱԳ նախարարության Ամերիկայի դեպարտամենտի գլխավոր տնօրեն Իսա Քամելի կողմից կանչել է ԱԳՆ։
Հանդիպման ընթացքում Քամելին դատապարտել է սադրիչ հայտարարությունները, որոնք խախտում են միջազգային իրավունքը և ՄԱԿ-ի կանոնադրությունը։ Նա պաշտոնապես փոխանցել է Իրանի դիվանագիտական նախազգուշացումը՝ ընդգծելով երկրի հաստատակամ և անհապաղ արձագանքը ցանկացած սպառնալիքի:
Շվեյցարիայի ներկայացուցիչը հավաստիացրել է իրանցի պաշտոնյաներին, որ ուղերձն անհապաղ կփոխանցվի ԱՄՆ կառավարությանը:
Հիշեցնենք, որ ԱՄՆ նախագահ Դոնալդ Թրամփը սպառնացել էր Իրանին ռմբակոծությամբ ու երկրորդական մաքսատուրքերով, եթե Թեհրանն իր վարչակազմի հետ համաձայնության չգա միջուկային ծրագրի շուրջ։
Իրանի գերագույն հոգևոր առաջնորդ այաթոլլահ Ալի Խամենեին էլ զգուշացրել էր, որ Միացյալ Նահանգներին ծանր հարված կհասցվի, եթե իրագործի նախագահ Դոնալդ Թրամփի՝ Իրանը ռմբակոծելու սպառնալիքը։
Թարգմանությունը՝ Էմմա Չոբանյանի
