Փարաքարում մեկնարկել են արտահերթ ընտրությունները. ՈՒՂԻՂ

Փարաքար խոշորացված համայնքում մեկնարկեցին տեղական ինքնակառավարման մարմինների ընտրությունները։ Առավոտ ժամը 08:00-ին 20 հազար 967 ընտրողի համար բացվել է 16 ընտրատեղամաս։ Ընտրատեղամասերը կգործեն մինչև 20:00-ն, ինչից հետո դրանք կփակվեն և կսկսվի քվեաթերթիկների հաշվարկը։

Փարաքարում համայնքի ղեկավարումը ստանձնելու համար հայտ է ներկայացրել քաղաքական չորս ուժ՝ «Քաղաքացիական պայմանագիր», «Ազգային առաջընթաց», «Կայունություն» կուսակցությունները և «Միասնություն» կուսակցությունների դաշինքը՝ բաղկացած «Ապրելու երկիր» և «Հաղթանակ» կուսակցություններից:
«Քաղաքացիական պայմանագիր» կուսակցության ընտրական ցուցակի առաջին համարը Փարաքար համայնքի նախկին ղեկավար, այժմ պաշտոնակատար ՔՊ-ական Լյուդվիգ Գյուլնազարյանն է:

«Ազգային առաջընթաց» կուսակցության նախընտրական ցուցակը գլխավորում է Փարաքարի նախկին ղեկավար Դավիթ Մինասյանը: Նա հրաժարականի դիմում էր ներկայացրել 2024թ. մայիսին՝ մոտ 2,5 տարի համայնքը ղեկավարելուց հետո:

«Կայունություն» կուսակցության ցուցակը գլխավորում է Փարաքարի համայնքապետի նախկին տեղակալ Գոռ Սարիբեկյանը։

«Միասնություն» կուսակցությունների դաշինքը բաղկացած է «Ապրելու երկիր» և «Հաղթանակ» կուսակցություններից: Ցուցակի առաջին համարը «Ապրելու երկիր» կուսակցության անդամ, Փարաքար համայնքի ավագանու անդամ Վալոդյա Գրիգորյանն է:

Հիշեցնենք, որ Փարաքարի նախկին համայնքապետ Լյուդվիգ Գյուլնազարյանը հրաժարական էր ներկայացրել նախորդ տարի՝ նոյեմբերի 18-ին Երևանում կատարված զինված միջադեպից հետո. սպանություն էր տեղի ունեցել, իսկ Գյուլնազարյանը ոտքից վիրավորվել էր:
Գյուլնազարյանը հրաժարականի դիմում էր ներկայացրել՝ պատճառաբանելով, որ չի ցանկանում որևէ ազդեցություն ունենալ նախաքննության վրա, թեև նրա պնդմամբ՝ դեպքի վայրում պատահմամբ է հայտնվել։

Նրա հրաժարականից 2 ամիս անց, իշխող ՔՊ կուսակցությունը Փարաքարում փրայմերիզ անցկացրեց. նախնական ընտրությունների արդյունքում 6 թեկնածուներից համայնքի ղեկավարի պաշտոնակատար ընտրվեց Լյուդվիգ Գյուլնազարյանը՝ հավաքելով 594 քվե։