Քաղաքականություն
28.03.2025 | 11:31
ՌԴ նախագահ Վլադիմիր Պուտինն առաջարկել է քննարկել ՄԱԿ-ի և մի շարք երկրների հովանու ներքո Ուկրաինայում ժամանակավոր կառավարման ներդրման հարցը՝ այնտեղ ընտրություններ անցկացնելու համար, գրում է Meduza-ն։
«Սկզբունքորեն կարելի է ՄԱԿ-ի, ԱՄՆ-ի, եվրոպական երկրների և, իհարկե, մեր գործընկերների ու ընկերների հովանու ներքո քննարկել Ուկրաինայում ժամանակավոր կառավարման ներդրման հնարավորությունը՝ ժողովրդավարական ընտրություններ անցկացնելու համար, նրա համար, որ իշխանության գա մի կառավարություն, որը գործունակ է և վայելում է ժողովրդի վստահությունը, իսկ հետո բանակցություններ սկսել նրանց հետ խաղաղության պայմանագրի շուրջ»,- ասել է Պուտինը մարտի 27-ի գիշերը «Արխանգելսկ» միջուկային սուզանավերի նավաստիների հետ զրույցում։
Ըստ նրա՝ այս կառավարության հետ հնարավոր կլինի ստորագրել «լեգիտիմ փաստաթղթեր, որոնք կճանաչվեն ամբողջ աշխարհում և կլինեն հուսալի»։
«Բայց սա միայն տարբերակներից մեկն է, ես չեմ ասում, որ ուրիշներ չկան։ Բայց սա տարբերակներից մեկն է, և նման պրակտիկա գոյություն ունի ՄԱԿ-ի աշխատանքում»,- հավելել է ՌԴ նախագահը։
Նա նաև հայտարարել է, որ ռուս զինվորականների ձեռքում է Ուկրաինայում նախաձեռնողությունը և նրանք ունակ են հաղթել ուկրաինական զորքերին։
«Մենք աստիճանաբար, ոչ այնքան արագ, որքան կցանկանային ոմանք, բայց, այնուամենայնիվ, համառորեն և վստահորեն շարժվում ենք այս գործողության սկզբում նշված բոլոր նպատակներին հասնելու ուղղությամբ»,- ասել է Պուտինը՝ նշելով՝ մարտական շփման ամբողջ գծի երկայնքով ռուսական զորքերի ձեռքում է ռազմավարական նախաձեռնությունը։
ՌԴ նախագահը նախկինում մի քանի անգամ ասել է, որ Ուկրաինայի նախագահ Վլադիմիր Զելենսկիին չի համարում լեգիտիմ նախագահ, քանի որ 2024 թվականին երկրում ընտրություններ չեն կայացել: Ուկրաինական օրենսդրությունն արգելում է ցանկացած ընտրությունների անցկացումը, քանի դեռ երկրում ռազմական դրություն է գործում:
Թարգմանությունը՝ Էմմա Չոբանյանի
