30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Ղազախստանը ողջունում է Երևանի և Բաքվի միջև խաղաղության պայմանագրի բանակցությունների ավարտը․ Տոկաևն ընդունել է Արարատ Միրզոյանին
Քաղաքականություն
27.03.2025 | 15:32
Ղազախստանում գտնվող ՀՀ ԱԳ նախարար Արարատ Միրզոյանին ընդունել է այդ երկրի նախագահ Կասիմ-Ժոմարտ Տոկաևը։ Նա նշել է, որ նախորդ տարի տեղի ունեցած նախագահների փոխայցելությունները լուրջ խթան են հաղորդել ղազախ-հայկական հարաբերությունների համակողմանի զարգացմանը։
«Ձեր առաջին պաշտոնական այցը Աստանա մեծ նշանակություն ունի մեր գործընկերության առաջխաղացման տեսանկյունից: Մենք մեծ համակրանք ունենք հայ ժողովրդի և ձեր պետության հանդեպ»,- ասել է Տոկաևը։
Նա նշել է, որ Ղազախստանը ողջունում է Երևանի և Բաքվի միջև խաղաղության ու միջպետական հարաբերությունների հաստատման մասին համաձայնագրի նախագծի տեքստի շուրջ բանակցությունների ավարտը։ Ըստ Տոկաևի՝ այդ նշանակալից իրադարձությունը կլինի Հայաստանի և Ադրբեջանի միջև կայուն խաղաղության հաստատման նախանշանը և կնպաստի տարածաշրջանում անվտանգության ամրապնդմանը և համագործակցության ակտիվ զարգացմանը ինչպես Ղազախստանի, այնպես էլ Կենտրոնական Ասիայի բոլոր երկրների հետ։
Միրզոյանն իր հերթին շնորհակալություն է հայտնել ջերմ ընդունելության համար։
«Մենք հիմնականում կիսում ենք մեր երկրների միջև ռազմավարական գործընկերության ձեր տեսլականը»,- ասել է նա՝ նշելով, որ Հայաստանի և Ղազախստանի արտաքին գործերի նախարարությունները և այլ գերատեսչություններ աշխատում են նախորդ տարի Կասիմ-Ժոմարտ Տոկաևի՝ Երևան կատարած պաշտոնական այցի ընթացքում ձեռք բերված պայմանավորվածությունների իրականացման ուղղությամբ։
Հանդիպման ընթացքում քննարկվել են երկկողմ հարաբերությունների զարգացման հեռանկարները առևտրատնտեսական, ներդրումային, տրանսպորտային, նյութատեխնիկական և մշակութային ու հումանիտար ոլորտներում։ Տոկաևը հայտարարել է Հայաստան ապրանքների մատակարարումը 350 մլն դոլարով ավելացնելու՝ տեղական բիզնեսի պատրաստակամության մասին։
Թարգմանությունը՝ Էմմա Չոբանյանի
