Ուկրաինան և ՌԴ-ն միմյանց մեղադրում են ենթակառուցվածքներին լայնածավալ հարվածների մեջ

Ուկրաինան և Ռուսաստանը միմյանց մեղադրում են քաղաքացիական ենթակառուցվածքներին լայնածավալ հարվածներ հասցնելու մեջ՝ չնայած Էր Ռիադում ձեռք բերված փոխադարձ պայմանավորվածություններին, որոնց մասին ԱՄՆ-ը հայտնել էր նախօրեին, գրում է BBC-ի ռուսական ծառայությունը։

Ռուսաստանի Պաշտպանության նախարարությունը հայտարարել է, որ ուկրաինական ուժերը թիրախավորում են էներգետիկ ենթակառուցվածքները՝ չնայած Սաուդյան Արաբիայում բանակցություններին: Ռուսական կողմի հաղորդագրության մեջ ասվում է, որ մարտի լույս 26-ի գիշերը ուկրաինական անօդաչու թռչող սարքերը փորձել են գրոհել Ղրիմում՝ Թարխանկուտ հրվանդանի տարածքում գտնվող «Գլեբովսկոյե ստորգետնյա գազապահեստարանի ցամաքային սարքավորումները»։

Մոսկվան  պնդում է, որ չորեքշաբթի առավոտյան ուկրաինական անօդաչու թռչող սարքը հարվածել է նաև Բրյանսկի մարզում գտնվող էլեկտրաէներգիայի օբյեկտին, ինչի հետևանքով բարձրավոլտ գիծն անջատվել է, Կոմարիչսկի շրջանի սպառողները մնացել են առանց էլեկտրամատակարարման։

ՌԴ ՊՆ-ն նաև նշում է, որ մարտի 25-ին ուկրաինական անօդաչու թռչող սարքը խոցել է «Ռոսսետի կենտրոն» ՓԲԸ-ի «Կուրսկեներգո» մասնաճյուղի էներգետիկ օբյեկտը, ինչի հետևանքով «մի շարք ենթակայանների կասկադային անջատում է տեղի ունեցել, Խոմուտովսկի թաղամասի ավելի քան 4000 սպառողներ մնացել են առանց էլեկտրաէներգիայի»:

Մոսկվայի պնդմամբ՝ Կիևն «ամեն ինչ անում է՝ ուկրաինական հակամարտությունը լուծելու փուլային քայլերի վերաբերյալ ռուս-ամերիկյան պայմանավորվածությունները խափանելու համար»։

Ուկրաինայի իշխանությունները չեն մեկնաբանել ռուսական էներգետիկ ենթակառուցվածքին հարվածների մասին պնդումները։

Միաժամանակ, այս առավոտյան Ուկրաինայի նախագահ Վլադիմիր Զելենսկին մեղադրել է Ռուսաստանին քաղաքացիական ենթակառուցվածքների ուղղությամբ հարվածների մեջ, ինչը նա անվանել է «ապացույց, որ Ռուսաստանը ձգձգում է այս պատերազմը»։ Նրա խոսքով՝ ՌԴ բանակը հարձակվել է 117 ԱԹՍ-ներով, որոնք ուղղված են եղել նաև քաղաքացիական ենթակառուցվածքների դեմ։

«Հրադադարի բանակցություններից հետո նման լայնածավալ հարվածներ հասցնելը նշանակում է աշխարհում բոլորին հստակ ցույց տալ, որ Մոսկվան չի պատրաստվում իրական խաղաղություն հաստատել»,- գրել է Զելենսկին։

Ավելի վաղ Ռուսաստանը հրապարակել էր Էր Ռիադում ձեռք բերված պայմանավորվածությունների իր տարբերակը, ըստ որի՝ մարտի 18-ից ուժի մեջ է մտնում Ռուսաստանի և Ուկրաինայի էներգետիկ օբյեկտներին հարվածելու 30-օրյա արգելքը։

Թարգմանությունը՝ Էմմա Չոբանյանի