19.02.2026 | 10:20
Հունաստանում փոխըմբռնման հուշագիր է ստորագրվել թվայնացման և բարձր տեխնոլոգիաների ոլորտում համագործակցության մասին
Զանգվածային ակցիաների ֆոնին Թուրքիայի կառավարությունը հինգ օրով արգելել է ցույցերն Անկարայում և Իզմիրում
Քաղաքականություն
21.03.2025 | 16:36
Ստամբուլի ընդդիմադիր քաղաքապետ Էքրեմ Իմամօղլուի ձերբակալությունից հետո վերջին երկու օրերին թուրքական տարբեր քաղաքներում անցկացվող զանգվածային բողոքի ակցիաների ու հանրահավաքների ֆոնին՝ Թուրքիայի իշխանությունները հինգ օրով արգելել են ցույցերի անցկացումը մայրաքաղաք Անկարայում և Իզմիրում։
Իզմիրի նահանգապետարանը, մասնավորապես, մարտի 21-ից մարտի 25-ը քաղաքում արգելում է բողոքի ցույցերն ու ակցիաները։
«Սադրիչ գործողությունները կանխելու նպատակով 2025 թվականի մարտի 21-ի առավոտյան ժամը 10:00-ից մինչև մարտի 25-ի ժամը 23:59-ը արգելվում են բոլոր հավաքները, բողոքի ակցիաները և հաղորդագրությունների հրապարակումները»,- ասվում է հաղորդագրության մեջ։
Անկարայի նահանգապետարանն էլ հայտարարել է մարտի 21-ից 25-ն ընկած ժամանակահատվածում հավաքների, բողոքի ակցիաների, մամուլի հաղորդագրությունների հրապարակման, վրանների, կանգառների տեղադրման, նստացույցերի, ստորագրահավաքների և նմանատիպ միջոցառումների արգելքի մասին՝ ինչպես փակ տարածքներում, այնպես էլ դրսում։
Ավելի վաղ հավաքների արգելք էր սահմանվել Ստամբուլում, որը գործելու է մինչև մարտի 23-ը։
Հիշեցնենք, որ Թուրքիայի տարբեր քաղաքներում նախօրեին զանգվածային ցույցերի ժամանակ ոստիկաններն արցունքաբեր գազ և ջրցաններ էին կիրառել։
Թարգմանությունը՝ Էմմա Չոբանյանի
