10.05.2025 | 15:55
Հանրապետությունում սպասվում են անձրևներ
ԱՄՆ-ը մինչև մայիս Թուրքիային ազատել է ռուսական գազի հետ կապված պատժամիջոցներից
Քաղաքականություն
20.03.2025 | 23:18
Թուրքիան լրացուցիչ ժամկետով ազատվել է ռուսական բնական գազի գնման հետ կապված ԱՄՆ պատժամիջոցներից։ Տեղեկությունը հաստատել է հարցին ծանոթ թուրք պաշտոնյան, հաղորդում է Bloomberg-ը, որին վկայակոչում է Turkiye today-ը։
Միացյալ Նահանգները համաձայնել է երկարաձգել պատժամիջոցներից ազատման ժամկետը, որը նախատեսված էր մինչև մարտի 20-ը, ինչը թույլ կտա Թուրքիային պահպանել Ռուսաստանից կարևոր էներգակիրների ներմուծումը մինչև մայիս:
Թուրքիան շարունակում է մեծապես կախված լինել ռուսական գազի մատակարարումից, որը կազմել է անցյալ տարի երկրի գազի ներմուծման ավելի քան 45%-ը։ Ընդլայնումն արտացոլում է Թուրքիայի էներգետիկ կարիքների գործնական իրողությունները, հատկապես, սովորականից ավելի ցուրտ ձմռանից հետո: Պաշտոնյաներն ակնկալում են, որ ռուսական մատակարարումները զգալիորեն կպահպանվեն ամառվա ամիսներին, երբ հիդրոէլեկտրակայանի արտադրության նվազում է կանխատեսվում։
Հավելենք, որ այս շաբաթվա սկզբին Թուրքիայի ֆինանսների նախարար Մեհմեդ Շիմշեքը և ԱՄՆ ֆինանսների նախարար Սքոթ Բեսենթը հեռախոսազրույց էին ունեցել՝ քննարկելով պատժամիջոցները, ինչպես նաև երկկողմ հետաքրքրություն ներկայացնող տնտեսական և ազգային անվտանգության այլ հարցեր։
Պատժամիջոցներից հրաժարվելու հարցը հաջորդում է նոյեմբերին ԱՄՆ-ի սահմանափակող միջոցներին, որոնք կիրառվել էին Գազպրոմբանկի դեմ, որի միջոցով իրականացվում են էներգիայի վճարումները՝ որպես Ռուսաստանի գազի եկամուտները կրճատելու՝ Վաշինգտոնի ավելի լայն ռազմավարության մաս: Այնուամենայնիվ, խոշոր ներկրողներին, ներառյալ՝ Թուրքիային և Հունգարիային, հետագայում արտոնություններ էին տրվել։
Թարգմանությունը՝ Էմմա Չոբանյանի
