22.06.2026 | 04:06
ԱԱ-2026. Ուրուգվայ – Կաբո Վերդե` 2:2. ՏԵՍԱՆՅՈՒԹ
Թրամփը Իրանին ուղղված «կոշտ» նամակում 2 ամիս ժամանակ է տվել՝ միջուկային նոր գործարքի համար․ Axios
Քաղաքականություն
20.03.2025 | 15:56
ԱՄՆ նախագահ Դոնալդ Թրամփի նամակը՝ ուղղված Իրանի գերագույն հոգևոր առաջնորդ Ալի Խամենեիին, երկամսյա վերջնաժամկետ է սահմանում միջուկային նոր համաձայնագրի համար։ Այս մասին Axios-ին հայտնել են ամերիկացի մի պաշտոնյա և նամակին ծանոթ երկու այլ աղբյուրներ:
Ըստ լրատվամիջոցի՝ պարզ չէ՝ երկամսյա ժամանակացույցը սկսվում է նամակի ուղարկման պահի՞ց, թե երբ սկսվեն բանակցությունները։ Բայց եթե Իրանը մերժի Թրամփի հայտարարությունները և չբանակցի, ապա Իրանի միջուկային օբյեկտների դեմ ԱՄՆ-ի կամ Իսրայելի ռազմական գործողությունների հնարավորությունները կտրուկ կմեծանան, ասել են աղբյուրները:
Իրանի միջուկային ծրագիրն առաջընթաց է ապրել վերջին չորս տարիների ընթացքում, հիմա Թեհրանն ավելի քան երբևէ մոտ է միջուկային զենք արտադրելուն:
Նամակը մի քանի օր առաջ Թրամփի բանագնաց Սթիվ Ուիթկոֆը Աբու Դաբիում կայացած հանդիպման ժամանակ փոխանցել է Արաբական Միացյալ Էմիրությունների նախագահ Մուհամեդ Բին Զայեդին։ Մեկ օր անց ԱՄԷ նախագահի բանագնաց Անվար Գարգաշը մեկնել է Թեհրան և նամակը փոխանցել Իրանի արտգործնախարար Աբբաս Արաղչիին։
Աղբյուրները նշում են, որ Թրամփի նամակը Խամենեիին «կոշտ» է: Մի կողմից նա առաջարկել է բանակցություններ վարել նոր միջուկային համաձայնագրի շուրջ, մյուս կողմից՝ զգուշացրել հետևանքների մասին, եթե Իրանը մերժի առաջարկը և շարունակի առաջ մղել իր միջուկային ծրագիրը: Աղբյուրներն ասել են նաև, որ նամակում Թրամփը նշել է, թե չի ցանկանում անժամկետ բանակցություններ և նշել է երկամսյա ժամկետ՝ գործարքի հասնելու համար։
Մինչ նամակն իրանցիներին հանձնելը, Սպիտակ տունը ԱՄՆ մի քանի դաշնակիցների, այդ թվում՝ Իսրայելին, Սաուդյան Արաբիային և ԱՄԷ-ին, տեղեկացրել է դրա բովանդակության մասին։
Սպիտակ տունը հրաժարվել է մեկնաբանություն տալ։ ՄԱԿ-ում Իրանի առաքելությունը չի պատասխանել լրատվամիջոցի մեկնաբանությունների խնդրանքներին:
Թարգմանությունը՝ Էմմա Չոբանյանի
