ԱՄՆ-ն ու ԵՄ-ն արձագանքել են Ստամբուլի ընդդիմադիր քաղաքապետի ձերբակալմանը․ ԵԽԽՎ-ն անհապաղ ազատ արձակելու կոչ է արել

ԱՄՆ Պետքարտուղարությունն արձագանքել է Ստամբուլի ընդդիմադիր քաղաքապետ Էքրեմ Իմամօղլուի ձերբակալությանը, որը երկրի նախագահ Ռեջեփ Թայիփ Էրդողանի մրցակիցն է նախագահական ընտրություններում։

Պետդեպի խոսնակ Բրյուս Թամմիին Իմամօղլուի մասին ուղղված հարցին՝ «Թուրքիայի նախագահ Ռեջեփ Թայիփ Էրդողանի գլխավոր մրցակից Իմամօղլուն ձերբակալվել է կոռուպցիայի և ահաբեկչությանն օժանդակելու հետաքննության շրջանակներում, մտահոգվա՞ծ եք, ինչպե՞ս եք գնահատում», պաշտոնյան պատասխանել է․ «Մենք կարող ենք խրախուսել Թուրքիային՝ հարգել մարդու իրավունքները և պատշաճ կերպով կարգավորել սեփական ներքին գործերի շրջանակը։ Մենք չենք մեկնաբանի այլ երկրի ներքին որոշումների կայացման գործընթացները։ Պարզապես հիշեցնում ենք՝ ակնկալում ենք, որ նրանք կգործեն այնպես, որ հարգեն իրենց բոլոր քաղաքացիների իրավունքները: Սա շատ պարզ է, բայց լավ է կրկնել»։

Եվրահանձնաժողովի նախագահ Ուրսուլա ֆոն դեր Լեյենն էլ հայտարարել է, որ Ստամբուլի քաղաքապետ Էքրեմ Իմամօղլուի ձերբակալությունը «խորապես մտահոգիչ է»:

«Թուրքիան պետք է պաշտպանի ժողովրդավարական արժեքները, հատկապես, ընտրված պաշտոնյաների իրավունքները։ Ուստի մենք ցանկանում ենք, որ Թուրքիան խարսխված մնա Եվրոպայի հետ, բայց դա պահանջում է հստակ հավատարմություն ժողովրդավարական նորմերին և գործելակերպին, և կարևոր է, որ Թուրքիան հարգի այս հիմնարար սկզբունքները»,- ընդգծել է նա։

Միաժամանակ, Ստրասբուրգում կայացած հանդիպման ժամանակ Եվրախորհրդի խորհրդարանական վեհաժողովի (ԵԽԽՎ) բյուրոն հանդես է եկել հայտարարությամբ՝ կոչ անելով ազատ արձակել Իմամօղլուին։

«Խորհրդարանական վեհաժողովի բյուրոն իր խորը մտահոգությունն է հայտնում Ստամբուլի քաղաքապետ, Ժողովրդահանրապետական ​​կուսակցության (CHP) ներկայացուցիչ Էքրեմ Իմամօղլուի ձերբակալության կապակցությամբ, որը պետք է ընտրվեր որպես CHP-ի թեկնածու 2028 թվականի նախագահական ընտրություններին ընդառաջ։ Թուրքիայի իշխանությունները նման որոշում են կայացրել կոռուպցիոն հետաքննության համատեքստում, որը հանգեցրել է հարյուրավոր մարդկանց, այդ թվում՝ այլ քաղաքական գործիչների, լրագրողների և գործարարների ձերբակալությունների։ Նմանապես, Բյուրոն անհանգստացած է Ստամբուլի համալսարանի երեկվա որոշումից՝ չեղյալ համարելու պարոն Իմամօղլուի համալսարանական աստիճանը, ինչը, ըստ թուրքական օրենսդրության, փաստացի թույլ չի տալիս նրան առաջադրվել երկրի նախագահի պաշտոնում»,- ասվում է հայտարարության մեջ։

Բյուրոն հիշեցնում է, որ Թուրքիան, որպես Եվրոպայի խորհրդի անդամ երկիր, պարտավորվել է պահպանել և առաջ մղել ժողովրդավարական արժեքները։ Ուստի, կոչ է անում  Թուրքիայի իշխանություններին անհապաղ ազատ արձակել Իմամօղլուին և հանել բոլոր անհիմն մեղադրանքները նրա ու այլ կալանավորված քաղաքական գործիչների նկատմամբ։ Այն նաև Ստամբուլի համալսարանին կոչ է արել վերացնել Իմամօղլուի դիպլոմը չեղարկելու որոշումը։

Հիշեցնենք, որ նախօրեին Ստամբուլում երեք առանձին հետաքննության շրջանակում 106 մարդ է ձերբակալվել, որոնց թվում է Ստամբուլի քաղաքապետ Էքրեմ Իմամօղլուն։

Թարգմանությունը՝ Էմմա Չոբանյանի