Պուտինը փակ հանդիպման ժամանակ ասել է, որ ՌԴ-ն չի հավակնի Օդեսային և Ուկրաինայի այլ տարածքներին, եթե բռնակցված շրջանները ռուսական ճանաչվեն. Կոմերսանտ

Ռուսաստանի Արդյունաբերողների և ձեռներեցների միության ներկայացուցիչների հետ փակ հանդիպման ժամանակ ՌԴ նախագահ Վլադիմիր Պուտինն ասել է, որ Մոսկվան չի հավակնի Ուկրաինայի «Օդեսային և այլ տարածքներին», եթե խաղաղ բանակցությունների ընթացքում Ղրիմը, ինքնահռչակ Դոնեցկի և Լուգանսկի հանրապետությունները, ինչպես նաև բռնակցված Խերսոնի և Զապորոժիեի շրջանները ճանաչվեն ռուսական։ Այս մասին գրել է «Կոմերսանտ»-ի հատուկ թղթակից Անդրեյ Կոլեսնիկովը։

Վկայակոչելով հանդիպման մի քանի մասնակիցների՝ լրագրողը պնդում է, որ միջոցառման փակ հատվածում Պուտինը գործարարների հետ խոսել է ոչ թե բիզնեսի, այլ Ուկրաինայի և խաղաղ բանակցությունների մասին։ ՌԴ նախագահը հայտարարել է, որ Ուկրաինան հնարավորություն է ունեցել «քիչ արյունահեղությամբ ազատվել» և սկսել է խոսել Ղրիմի ճանաչման մասին։

«Հետո պարզ դարձավ, որ նրանք չեն ցանկանում լսել Լուգանսկի և Դոնեցկի Հանրապետությունների ինքնավարությունը, ինչպես նաև Խերսոնի և Զապորոժիեի շրջանները Ռուսաստանի կազմում ճանաչելու մասին։ Եվ որքան հետ էր մղվում այն ​​կետը, որտեղ Ռուսաստանը կարող էր կանգնեցվել, այնքան ավելի քիչ էր համաձայնության գալու հնարավորությունը»,- գրում է լրագրողը։

Ըստ նրա զրուցակիցների՝ Պուտինը հանդիպման ժամանակ ասել է, այժմ բանակցություններում խոսքը Ղրիմը, Լուգանսկն ու Դոնեցկը, Խերսոնի և Զապորոժիեի շրջանները Ռուսաստանի կազմում ճանաչելու մասին է։ Չի նշվում, թե ով պետք է անի դա՝ միայն Ուկրաինա՞ն, թե՞ նաև ԱՄՆ-ն՝ Եվրոպայի հետ միասին։

«Եթե դա տեղի ունենա առաջիկայում, Ռուսասատանը, ինչպես պատմել են հանդիպման մասնակիցները, չի հավակնի Օդեսային ու այլ տարածքներին, որոնք հիմա պատկանում են Ուկրաինային։ Բայց այս կետը կարող է նաև փոխվել։ Միաժամանակ, հանդիպման բոլոր մասնակիցները նույն բանն են նշել՝ Վլադիմիր Պուտինը հավատում է, որ իրենց կարծիքով՝ հնարավոր է համաձայնության գալ Դոնալդ Թրամփի հետ, իսկ, ընդհանուր առմամբ, նա իրականում հավատում է Դոնալդ Թրամփին»,- ասվում է հրապարակման մեջ։

Հավելենք, որ Վլադիմիր Պուտինի փակ հանդիպումը բիզնեսի ներկայացուցիչների հետ տեղի է ունեցել նախօրեին՝ ՌԴ նախագահի՝ Դոնալդ Թրամփի հետ հեռախոսազրույցից առաջ։

Թարգմանությունը՝ Էմմա Չոբանյանի