09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
Ադրբեջանում ցամաքային սահմանները փակ կմնան մինչև 2025թ․ հուլիսի 1-ը․ իշխանությունները երկարաձգել են COVID-ի կարանտինային ռեժիմը
Քաղաքականություն
18.03.2025 | 16:06
Ադրբեջանի իշխանությունները կրկին երկարաձգել են կորոնավիրուսի համավարակով պայմանավորված երկրի տարածքում հատուկ կարանտինային ռեժիմը։ Ադրբեջանական լրատվամիջոցների հաղորդմամբ՝ կարանտինային ռեժիմը երկարացվել է մինչև 2025 թվականի հուլիսի 1-ը՝ ժամը 06:00-ն։
2024-ի դեկտեմբերի վերջին կարանտինային ռեժիմը երկարացվել էր մինչև 2025 թվականի ապրիլի 1-ը։
Ադրբեջանը կորոնավիրուսի համավարակի պատճառով 2020 թվականի մարտից կարանտինային ռեժիմում է, հինգ տարի է՝ երկրի ցամաքային սահմանները փակ են։ Չնայած Առողջապահության համաշխարհային կազմակերպությունը հայտարարել է աշխարհում COVID-19-ի համաճարակի ավարտի մասին՝ աշխարհի բոլոր երկրները դուրս են եկել կարանտինային ռեժիմից, Ադրբեջանում այն պարբերաբար երկարաձգվում է, թեև համաճարակի հետ կապված բոլոր սահմանափակումները հանվել են։
Դեռևս նախորդ տարի սեպտեմբերի 23-ին, ելույթ ունենալով 7-րդ գումարման խորհրդարանի առաջին նիստում, Ադրբեջանի նախագահ Իլհամ Ալիևը փակ սահմանների պահպանումը բացատրել էր արտաքին սպառնալիքներով։
«Այն, որ վերջին տարիներին մեր ցամաքային սահմանները փակ են մնում, մեզ փրկել է շատ մեծ աղետներից։ Այսօր էլ, երբ սահմանները փակ են մնում, վտանգավոր գործողություններ են իրականացվում, որոնք կասեցվում են։ Ուստի, սահմանների պաշտպանությունը մեզ կպաշտպանի արտաքին ռիսկերից»,- հայտարարել էր նա։
Թարգմանությունը՝ Էմմա Չոբանյանի
