13.01.2026 | 16:39
Ռադան պաշտոնանկ է արել Ուկրաինայի պաշտպանության նախարար Դենիս Շմիգալին և անվտանգության ծառայության ղեկավար Վասիլի Մալյուկին
Իսրայելը վերսկսել է ռազմական գործողությունները Գազայի հատվածում․ ավելի քան 300 մարդ է զոհվել
Քաղաքականություն
18.03.2025 | 11:20
Իսրայելի պաշտպանության բանակը մարտի լույս 18-ի գիշերը տասնյակ ավիահարվածներ է հասցրել Գազայի հատվածին։ The Times of Israel-ը, վկայակոչելով Իսրայելի բանակի հայտարարությունը, գրում է, թե թիրախավորվել են ՀԱՄԱՍ-ի միջին օղակի հրամանատարները, խմբավորման քաղբյուրոյի անդամներն ու ենթակառուցվածքները:
Իսրայելական բանակի տվյալներով՝ մինչ այժմ տասնյակ հարվածներ են հասցվել վարչապետ Բենիամին Նեթանյահուի և պաշտպանության նախարար Իսրայել Կացի հրամանով։
Բանակը հայտարարել է, թե մասշտաբային հարվածներ է հասցրել այն բանից հետո, երբ նկատել է, որ ՀԱՄԱՍ-ի ահաբեկիչները հարձակումներ են նախապատրաստում Իսրայելի վրա և փորձում են վերախմբավորվել: Պաշտպանության նախարար Իսրայել Կացն էլ հայտարարել է, որ հարվածները հասցվել, քանի որ ՀԱՄԱՍ-ը հրաժարվել է ազատ արձակել պատանդներին:
Իսրայելի վարչապետ Բենիամին Նեթանյահուն հայտարարել է, որ հրամայել է հարվածներ հասցնել ՀԱՄԱՍ-ին՝ զինադադարը երկարաձգելու և պատանդներին ազատելու բանակցություններում առաջընթացի բացակայության պատճառով:
«Այսուհետ Իսրայելը ՀԱՄԱՍ-ի դեմ կգործի մեծացող ռազմական հզորությամբ»,- ասվում է նրա հայտարարության մեջ։
Իսրայելի իշխանությունները հայտարարել են, որ գործողությունն անժամկետ է և ակնկալվում է ընդլայնել այն:
ՀԱՄԱՍ-ի բարձրաստիճան պաշտոնյան էլ ասել է, որ Իսրայելը որոշել է զոհաբերել իր պատանդներին՝ խախտելով հունվարյան զինադադարից հետո հարաբերական անդորրը և վերսկսելով զանգվածային ռազմական գործողությունները Գազայի հատվածում։
«Պատերազմը վերսկսելու՝ Նեթանյահուի որոշումը օկուպացիոն ուժերի բանտարկյալներին զոհաբերելու և նրանց մահապատժի դատապարտելու որոշում է»,- ասել է ՀԱՄԱՍ-ի ներկայացուցիչ Իզզաթ ալ-Ռիշքը՝ հավելելով, որ Իսրայելի վարչապետն օգտագործում է մարտերը որպես քաղաքական «փրկարար նավ»՝ ուշադրությունը ներքին ճգնաժամերից շեղելու համար։
ՀԱՄԱՍ-ի երկու աղբյուրներ էլ AFP-ին հայտնել են, որ Իսրայելի գիշերային հարվածների հետևանքով սպանվել է գեներալ Մահմուդ Աբու Վաթֆան, որը ղեկավարում էր այդ տարածքում զինյալ շարժման ներքին գործերի նախարարությունը:
Գազայի հատվածի առողջապահության նախարարությունը հայտնել է, որ զինադադարից ի վեր իսրայելական ամենաուժեղ հարվածների հետևանքով զոհերի թիվը հասել է առնվազն 330-ի, որոնց մեծ մասը պաղեստինցի կանայք և երեխաներ են։ Հարյուրավոր վիրավորներ կան, որոնցից տասնյակները ծայրահեղ ծանր վիճակում են, AFP-ին ասել է առողջապահության նախարար Մուհամմեդ Զաքութը:
Թարգմանությունը՝ Էմմա Չոբանյանի
