Ավագանու հերթական նիստի 27 հարցերից 21-ը չզեկուցվող է․ «Մայր Հայաստան»-ի նախագիծն օրակարգում է

Վաղը՝ մարտի 18-ին, Երևանի ավագանին հերթական նիստ կգումարի։ Օրակարգում ընդգրկված է 27 հարց, որից 21-ը չզեկուցվող հարցեր են։ Օրակարգի վերջին՝ 27-րդ հարցը տրանսպորտից օգտվելու սակագների վերաբերյալ ընդդիմության նախագիծն է։

Ավագանիում մեծությամբ երրորդ խմբակցությունը՝ «Մայր Հայաստան»-ն առաջարկում է հետևյալ փոփոխությունները։

1) 1 օրվա համար ֆիզիկական քարտ-տոմս կամ օնլայն հավելվածով էլեկտրոնային տոմս ձեռք բերելու դեպքում՝ ֆիզիկական քարտ տոմսի կամ օնլայն հավելվածով էլեկտրոնային տոմսի ակտիվացման պահից 24 ժամվա ընթացքում բոլոր տրանսպորտային միջոցներով անսահմանափակ ուղևորություն կատարելու հնարավորությամբ՝ 400 դրամ,

2) 7 օրվա համար ֆիզիկական քարտ-տոմս կամ օնլայն հավելվածով էլեկտրոնային տոմս ձեռք բերելու դեպքում՝ ֆիզիկական քարտ տոմսի կամ օնլայն հավելվածով էլեկտրոնային տոմսի ակտիվացման պահից 30 օրվա ընթացքում 7 օր բոլոր տրանսպորտային միջոցներով անսահմանափակ ուղևորություն կատարելու հնարավորությամբ՝ 2.000 դրամ,

3) 30 օրվա համար ֆիզիկական քարտ-տոմս կամ օնլայն հավելվածով էլեկտրոնային տոմս ձեռք բերելու դեպքում՝ ֆիզիկական քարտ տոմսի կամ օնլայն հավելվածով էլեկտրոնային տոմսի ակտիվացման պահից 90 օրվա ընթացքում 30 օր բոլոր տրանսպորտային միջոցներով անսահամափակ ուղևորություն կատարելու հնարավորությամբ՝ 5.500 դրամ,

4) 180 օրվա համար ֆիզիկական քարտ-տոմս կամ օնլայն հավելվածով էլեկտրոնային տոմս ձեռք բերելու դեպքում՝ ֆիզիկական քարտ տոմսի կամ օնլայն հավելվածով էլեկտրոնային տոմսի ակտիվացման պահից 1 տարվա ընթացքում 180 օր բոլոր տրանսպորտային միջոցներով անսահմանափակ ուղևորություն կատարելու հնարավորությամբ՝ 20.000 դրամ,

5) 365 օրվա համար ֆիզիկական քարտ-տոմս կամ օնլայն հավելվածով էլեկտրոնային տոմս ձեռք բերելու դեպքում՝ ֆիզիկական քարտ տոմսի կամ օնլայն հավելվածով էլեկտրոնային տոմսի ակտիվացման պահից 365 օր բոլոր տրանսպորտային միջոցներով անսահամանափակ ուղևորություն կատարելու հնարավորությամբ՝ 35.000 դրամ,

6) Կենսաթոշակառուները, հաշմանդամության բոլոր խմբերում գտնվող անձինք տրանսպորտային բոլոր միջոցներից օգտվում են անվճար՝ սույն ենթակետով նախատեսված համապատասխան կարգավիճակը հաստատող փաստաթղթի ներկայացման դեպքում։

Այս փաթեթներից զատ նախագծով առաջարկվում է նաև, որ մեկանգամյա ուղևորության համար գործեն նախկին սակագները՝ ավտոբուս և մետրո՝ 100 դրամ, տրոլեյբուս՝ 50 դրամ։ Որոշան նախագծի նախաձեռնողը «Մայր Հայաստան» շարժման առաջնորդ Անդրանիկ Թևանյանն է, և սա նշանակում է, որ ավագանու հերթական նիստին հենց նա է ներկայացնելու նախագիծը։ Ի դեպ, ուշագրավ է, որ նախագիծն օրակարագ է մտնում այն ներկայացնելուց ավելի քան մեկ տարի անց։

Արփի Հակոբյան