24.06.2026 | 22:10
Ուկրաինա-Բելառուս սահմանին գտնվող վերահեռարձակող կայանները դադարեցրել են աշխատանքը. Զելենսկի
«ՀՀ-ում ռևանշիստական միտումները լուրջ խոչընդոտ են հարաբերությունների կարգավորման գործընթացում»․ Բայրամովը հոդված է հրապարակել
Քաղաքականություն
17.03.2025 | 16:03
Ռևանշիստական միտումները Հայաստանում ամենալուրջ խոչընդոտն են Ադրբեջանի հետ հարաբերությունների կարգավորման գործընթացում։ Այս մասին ասվում է Ադրբեջանի արտաքին գործերի նախարար Ջեյհուն Բայրամովի՝ «Ադրբեջանի անկախ և ինքնիշխան արտաքին քաղաքականության մոդելը» հոդվածում, որը հրապարակվել է Միլլի Մեջլիսի վերլուծական տեղեկատվական ամսագրում։
«Չնայած Ադրբեջանի և Հայաստանի միջև խաղաղության համաձայնագրի շուրջ երկկողմ բանակցություններում ձեռք բերված առաջընթացին, Հայաստանում ռևանշիզմի շարունակվող միտումը, Ադրբեջանի նկատմամբ տարածքային պահանջներ պարունակող Սահմանադրության և այլ իրավական ակտերի դրույթները փոխելու՝ քաղաքական կամքի բացակայությունը, ինչպես նաև արտաքին ուժերի անմիջական աջակցությամբ Հայաստանի արագ սպառազինումը շարունակում են ամենալուրջ խոչընդոտը լինել հարաբերությունների կարգավորման գործընթացի ավարտի համար»,- ասվում է հոդվածում։
Նշվում է, թե այդ հարցերը շարունակում են մնալ Ադրբեջանի դիվանագիտության առանցքը, ինչպես նաև, իբր, «Հայաստանից վտարված շուրջ 300 հազար ադրբեջանցիների իրավունքների վերականգնման խնդիրը»։
Բայրամովի հոդվածում նաև ասվում է, թե պետք է շարունակեն հետևողական, համակարգված և վճռական արտաքին քաղաքական գործունեությունը, որն ուղղված է, իբր, Հայաստանի և նրա կողմնակիցների կողմից Ադրբեջանի դեմ զրպարտչական արշավը կանխելուն՝ միջազգային հանրությանը բացատրելով Ադրբեջանի ինքնիշխանության և տարածքային ամբողջականության սպառնալիքները չեզոքացնելու քայլերը, ինչպես նաև 44-օրյա պատերազմից և դրան հաջորդած Արցախի էթնիկ զտումից հետո այդ քայլերը կասկածի տակ դնելու և սահմանափակելու փորձերը կանխելը։
Թարգմանությունը՝ Էմմա Չոբանյանի
