«Ասում են՝ նախագահին տեսել, ուրախությունից զուգարանում ինֆարկտ է ստացել». հրապարակվեց Քոչարյանի անվտանգության նախկին պետի ցուցմունքը. ՏԵՍԱՆՅՈՒԹ

«Առագաստ» սրճարանում 2001 թվականին տեղի ունեցած սպանության գործով այսօր դատարանում հրապարակվեցին այն ժամանակ նախագահ եղած Ռոբերտ Քոչարյանի անվտանգության պետ Աղամալ Հարությունյանի՝ դատարանում տված ցուցմունքները:

Դատարանում քննվող գործը վերաբերում է 2001 թվականի սեպտեմբերի 24-ի լույս 25-ի գիշերը Հայաստանի երկրորդ նախագահ Ռոբերտ Քոչարյանի անվտանգության աշխատակից Հարությունյանի և Պողոսյանի միջև «Առագաստ» սրճարանում տեղի ունեցած միջադեպին, որի հետևանքով Պողոսյանը սպանվել էր: Դեպքի առթիվ հարուցված քրեական գործի շրջանակներում Աղամալ Հարությունյանը մեղավոր է ճանաչվել ՀՀ նախկին Քրեական օրենսգրքի 103-րդ հոդվածով նախատեսված՝ հանցավոր անփութությամբ անզգույշ սպանություն կատարելու համար, սակայն Հայաստանում տեղի ունեցած իշխանափոխությունից հետո այս գործը վերաբացվել է Աղամալյանի արարքը վերաորակվել դիտավորյալ սպանության:

Դատաքննական ցուցմունքներում Աղամալ Հարությունյանը հայտնել է, որ թերթերից է իմացել, որ Պողոս Պողոսյանը մահացել է:

«Ասում են՝ նախագահին տեսել է, ուրախությունից զուգարանում ինֆարկտ է ստացել»,- ի պատասխան դատարանում իրեն տրված հարցի՝ ասել է Աղամալ Հարությունյանը:

Նա նշել է, որ ինքն ու Պողոս Պողոսյանը զուգարանում վիճաբանության պահին երկուսով են եղել, մինչդեռ գործում առկա է վկա Ստեփան Նալբանդյանի ցուցմունքն այն մասին, որ այնտեղ մոտ 6 անձ է եղել:

Նալբանդյանի ցուցմունքի առնչությամբ Աղամալ Հարությունյանը հայտնել է, որ զուգարանում այդքան տեղ չկար:
Նշենք, որ այս գործի նախորդ քննության ընթացքում դատարանը հաստատված է համարել, որ 25.09.2001 թ.՝ ժամը 00:30-ի սահմաններում, Երևանի «Առագաստ» սրճարանի զուգարանում Աղամալ Հարությունյանի և ոգելից խմիչք օգտագործած վիճակում գտնվող Պողող Պողոսյանի միջև տեղի է ունեցել փոխադարձ քաշքշուկ, հասցվել են փոխադարձ հարվածներ, որոնց ընթացքում Պողոսյանը մեջքի ուղղությամբ վայր է ընկել, գլխի հետևի մասով հարվածել զուգարանի սալիկապատ հատակին, որի հետևանքով ստացած գանգուղեղային ծանր մարմնական վնասվածքից մահացել է: Դատարանի 2002 թ. փետրվարի 21-ի դատավճռով ամբաստանյալ Աղամալ Հարությունյանը դատապարտվել է 2 տարի ժամկետով ազատազրկման, միաժամանակ նշանակված պատիժը պայմանականորեն չի կիրառվել և սահմանվել է փորձաշրջան՝ 1 տարի ժամանակով: Դեպքի վերաբերյալ, սակայն, Հայաստանում տեղի ունեցած իշխանափոխությունից հետո դատախազությանն ուղարկված դիմումով նոր հանգամանքներ են ներկայացրել միջադեպի ականատես, վկա Սթիվեն Ջոն Նյուտոնի ներկայացուցիչները:

Ըստ Դատախազության՝ Նյուտոնի հայտարարության ուսումնասիրությամբ պարզվել է, որ այն էական նշանակություն ունեցող այնպիսի տեղեկություններ է պարունակում դեպքի մասին, որոնք առերևույթ վկայում են Պողոս Պողոսյանի՝ կյանքից ոչ թե անզգուշությամբ զրկվելու, այլ մի խումբ անձանց կողմից խուլիգանական դրդումներով դիտավորությամբ սպանության մասին: Այսպիսով՝ Պողոս Պողոսյանի մահվան փաստի առթիվ հարուցված քրեական գործով կայացված դատական ակտը նոր երևան եկած հանգամանքների հետևանքով վերանայելու համար Երևան քաղաքի դատախազությունում հարուցվել է համապատասխան վարույթ, ապա՝ Գլխավոր դատախազի տեղակալը բողոք է ներկայացրել ՀՀ վերաքննիչ դատարան՝ նոր երևան եկած հանգամանքների հիմքով գործը վերանայելու և 2002թ. փետրվարի 21-ի դատավճիռն ամբողջությամբ բեկանելու պահանջով։ Բողոքը բավարարվել է, և գործն ուղարկվել է առաջին ատյանի դատարան՝ նոր քննության։ Այս գործը դատավոր Կարեն Ֆարխոյանի վարույթում քննվում է գրեթե 4 տարի։ Դատարանն այժմ մեղադրյալի հարցաքննության փուլում է գտնվում, բայց, հաշվի առնելով, որ նա հրաժարվել է ցուցմունք տալ՝ հրապարակվում են նրա՝ նախկինում տված ցուցմունքերը:

Մանրամասները՝ տեսանյութում:

Արաքս Մամուլյան