Բաքուն հայտարարել է, թե սահմանին ԵՄ առաքելությունը «լուրջ ռիսկեր է ստեղծում Հարավային Կովկասի կայունության համար»

ԵՄ առաքելության ներկայությունը Հայաստանի տարածքում՝ ադրբեջանա-հայկական սահմանին, «լուրջ ռիսկեր է ստեղծում Հարավային Կովկասի կայունության համար»։ Ադրբեջանական լրատվամիջոցների հաղորդմամբ՝ այս մասին ասել է Ադրբեջանի փոխարտգործնախարար Էլնուր Մամեդովը Բաքվի XII գլոբալ ֆորումի շրջանակում։

«ԵՄ առաքելությունն արդեն երկրորդ տարին գործում է քաղաքացիական առաքելության քողի ներքո, սակայն իրականում զբաղվում է հետախուզական գործունեությամբ, ինչը լուրջ ռիսկեր է ստեղծում տարածաշրջանում կայունության համար»,- հայտարարել է նա։

Մամեդովն ասել է, որ չնայած Բաքուն ու Երևանն արդեն համաձայնեցրել են խաղաղության համաձայնագրի տեքստը, Հարավային Կովկասում խաղաղ գոյակցության համար կան մի շարք կարևոր պայմաններ, այդ թվում՝ Հայաստանի ռազմականացման դադարեցումն ու երրորդ երկրների ուժերի բացակայությունը տարածաշրջանում։

«Խաղաղության պայմանագրի նախագծի վրա աշխատանքները երկար են տարվում։ Վերջին երկու կետերը գրեթե երկու տարի մնացել էին չհամաձայնեցված, որոնցից մեկն ուղղակիորեն վերաբերում էր սահմանին երրորդ ուժերի չտեղակայմանը։ Հայաստանն ընդունել է այդ պայմանը, նշանակում է, որ մենք գնում ենք ճիշտ ուղղությամբ։ Սակայն կարևոր է, որ պահպանվեն բոլոր պայմանները՝ Հայաստանի սպառազինման դադարեցումն ու սահմանին երրորդ երկրների բացակայությունը»,- ասել է նա։

Պատասխանելով խաղաղության պայմանագրի ստորագրման հավանական ժամկետի և վայրի մասին հարցին՝ Ադրբեջանի ԱԳ փոխնախարարը նշել է, որ դեռևս վաղ է այդ մասին խոսել։

Թարգմանությունը՝ Էմմա Չոբանյանի